Tashkentte ýlanyp, aýrýhanaǵa túsken fýtbolshylardyń qanshasy elge oraldy
QARAǴANDY. KAZINFORM — Tashkentte ótken halyqaralyq Dostlik Cup 2026 týrnırine qatysýǵa baryp, ýlanyp, aýrýhanaǵa túsken qazaqstandyq jas fýtbolshylardyń basym bóligi elge qaıtyp jatyr. Sońǵy málimetke sáıkes, Ózbekstan astanasynda 11 bala men úsh ata-ana dárigerlerdiń baqylaýynda qalyp, em qabyldap jatyr.
Bul týraly Qazaqstandaǵy Bala quqyqtary jónindegi ýákil Dınara Zákıeva málimdedi.
Onyń aıtýynsha, ol Ózbekstandaǵy Bala quqyqtary jónindegi ýákilmen, Qaraǵandy oblysy ákiminiń orynbasary Álibek Áldeneımen jáne komandanyń bas bapkerimen turaqty baılanysta.
— Ózbekstannyń Densaýlyq saqtaý mınıstri jaǵdaıdy jeke baqylaýyna alǵan. Balalar tolyq saýyǵyp shyqqansha Ózbekstanda bolady. Al qalǵan balalar ata-analarymen birge búgin Qazaqstanǵa qaıtady, — dep habarlady Dınara Zákıeva.
Qaraǵandy oblysynyń dene shynyqtyrý jáne sport basqarmasy da jaǵdaıǵa qatysty málimet berdi. Vedomstvo týrnırge qatysqan komandalardyń jattyqtyrýshylarymen úzdiksiz baılanysta ekenin málimdedi.
Basqarmanyń habarlaýynsha, Tashkenttegi statsıonarda 11 bala men úsh ata-ana dárigerlerdiń baqylaýynda.
Budan bólek, saparǵa qatysqan 15 adam — sportshylar, ata-analar men jattyqtyrýshylar Tashkent áýejaıynan saǵat 15:10–da HY721 reısimen Astanaǵa ushyp shyqty. Qalǵan qatysýshylar 3 qarashada «Túrkistan — Pavlodar» baǵytyndaǵy poıyzben Qaraǵandyǵa oralady.
Eske salaıyq, halyqaralyq Dostlik Cup 2026 týrnırinde Qaraǵandy oblysynyń namysyn Jas Batir, Nomad Akademiya jáne Skaut jekemenshik fýtbol mektepteriniń tárbıelenýshileri qorǵaýǵa attanyp, jappaı ýlanyp qalǵan.
Jas sportshylar 2014, 2018 jáne 2019 jyly týǵan balalar arasyndaǵy jarysqa qatysty. Tashkentke barlyǵy 60 bala, 32 ata-ana jáne tórt jattyqtyrýshy barǵan. Sapar shyǵyndary jeke qarajat esebinen ótelgen.
Aıta keteıik, basqarmanyń 2 qarasha kúni saǵat 09:00–de taratqan alǵashqy málimetinde Tashkent qalasyndaǵy № 5 qalalyq juqpaly aýrýlar aýrýhanasyna 16 bala, bir jattyqtyrýshy jáne 11 ata-ana jatqyzylǵany aıtylǵan. Olardyń barlyǵy G’ayrat Hoji ota hotel qonaqúıinde turyp, sol jerde tamaqtanǵan.
