Tashkentte ýlanǵan jas fýtbolshylar elge oraldy
ASTANA. KAZINFORM — Tashkentte ótken halyqaralyq týrnır kezinde jappaı ýlanýdan aýrýhanaǵa túsken qaraǵandylyq jas fýtbolshylardyń barlyǵy emdelip, Qazaqstanǵa oraldy. Bul týraly Qazaqstannyń Ózbekstandaǵy elshiligi málim etti.
Qazaqstan men Ózbekstannyń densaýlyq saqtaý mınıstrlikteri birlesip istegen jumystyń nátıjesinde balalarǵa der kezinde medıtsınalyq kómek kórsetilip, elge aman-esen qaıtýyna jaǵdaı jasalǵan.
Oqıǵa tirkelgen alǵashqy kúnnen bastap Qazaqstannyń Ózbekstandaǵy dıplomatııalyq ókildigi zardap shekken balalardyń ata-analarymen, medıtsınalyq mekemelermen jáne eki eldiń quzyrly organdarymen turaqty baılanysta bolǵan. Sondaı-aq konsýldyq jáne uıymdastyrýshylyq kómek kórsetken.
Ózbekstan Densaýlyq saqtaý mınıstrligi de balalardyń jaǵdaıy jaqsaryp, barlyǵy aýrýhanadan shyqqanyn rastady.
Elge attanar aldynda medıtsına qyzmetkerleri men densaýlyq saqtaý salasynyń ókilderi jas sportshylardy shyǵaryp saldy.
Eske salaıyq, Qaraǵandy oblysynyń jas fýtbolshylary Tashkentte ótken Dostlik Cup 2026 týrnırine qatysý kezinde jappaı ýlaný deregi tirkelgen.
Osy oqıǵaǵa baılanysty Ózbekstan Bas prokýratýrasy sanıtarııalyq zańnama talaptaryn buzý deregi boıynsha qylmystyq is qozǵady.
Qazir tergeý amaldary jalǵasyp jatyr.
