Tashkentte ýlanǵan 10 qazaqstandyq aýrýhanadan shyqty
QARAǴANDY. KAZINFORM — Tashkentte em qabyldap jatqan qazaqstandyqtardyń qatary azaıdy. Qazir Ózbekstan astanasyndaǵy aýrýhanalarda segiz otandasymyz dárigerlerdiń baqylaýynda, olardyń altaýy — bala, ekeýi — eresek adam. Іshek ınfektsııasynyń qozdyrǵyshyn anyqtaıtyn zerthanalyq taldaý nátıjesi búgin keshke belgili bolady.
Qazaqstannyń Ózbekstandaǵy elshiliginiń málimetinshe, 2 qarasha kúni keshke Tashkent qalasyndaǵy № 5 qalalyq klınıkalyq juqpaly aýrýlar aýrýhanasyna taǵy bir bala jetkizilgen. Osydan keıin aýrýhanaǵa jatqyzylǵan qazaqstandyqtardyń jalpy sany 18-ge jetken. Olardyń 12-si bala bolsa, altaýy — eresek adam.
3 qarashadaǵy jaǵdaı boıynsha, 10 naýqas, onyń ishinde alty bala men tórt eresek adam aýrýhanadan shyǵarylǵan.
Qazir segiz qazaqstandyq em alyp jatyr.
— Naýqastardyń jaǵdaıy turaqty. Barlyǵy qajetti medıtsınalyq kómek alyp, bilikti mamandardyń turaqty baqylaýynda, — delingen elshilik habarlamasynda.
Naýqastardy odan ári emdeý máselesin talqylaý úshin Qazaqstannyń Ózbekstandaǵy elshisi Eraly Toǵjanovtyń qatysýymen dárigerler keńesi ótken.
— Dárigerler jas fýtbolshylardyń densaýlyǵy jaqsaryp kele jatqanyn atap ótti. Іshek ınfektsııasynyń qozdyrǵyshyn anyqtaý úshin júrgizilgen PTR taldaýynyń túpkilikti nátıjesi búgin keshke daıyn bolady, — dep habarlady elshilik.
Qazaqstan azamattaryna medıtsınalyq kómek kórsetý jumysyna Ózbekstan Densaýlyq saqtaý mınıstrligi men Tashkent qalasynyń ákimdigi de atsalysyp jatyr. Bul iske Ózbekstan densaýlyq saqtaý mınıstriniń orynbasary Olıma Omonova, Tashkent qalasy ákiminiń orynbasary Dýrdona Rahımova jáne qalalyq densaýlyq saqtaý bas basqarmasynyń jetekshisi Botır Isabekov tartylǵan.
Elshiliktiń kómegimen Qazaqstannyń 13 azamaty elge oralǵan. Sporttyq jarystarǵa qatysý úshin Ózbekstanǵa barlyǵy 95 qazaqstandyq barǵan. Málimet jarııalanǵan kezde olardyń 12-si áli de Ózbekstanda bolǵan. Onyń segizi aýrýhanada em qabyldap jatqan.
Qaraǵandy oblysynyń ákimi Ermaǵanbet Bólekpaev elge oralǵan azamattardy qarsy alý jáne óńirde medıtsınalyq tekserýden ótkizý jumystaryn úılestirip otyr. Qazaqstan men Ózbekstannyń densaýlyq saqtaý mınıstrlikteri naýqastardy emdeý jáne azamattardy elge qaıtarý máseleleri boıynsha ózara baılanysta jumys istep jatyr.
Eske salaıyq, Qaraǵandy oblysynyń jas fýtbolshylary Tashkentte ótken Dostlik Cup 2026 týrnırine qatysý kezinde jappaı ýlaný deregi tirkelgen bolatyn.
Osy oqıǵaǵa baılanysty Ózbekstan Bas prokýratýrasy sanıtarııalyq zańnama talaptaryn buzý deregi boıynsha qylmystyq is qozǵady.
Qazir tergeý amaldary jalǵasyp jatyr.
