Tashkentte ShYU-ǵa múshe elderdiń halyq áýenderi oryndaldy

TAShKENT. QazAqparat – Ózbekstan astanasynda Shanhaı Yntymaqtastyq Uıymynyń qurylǵanyna 21 jyl tolýyna oraı «ShYU halyqtarynyń mýzyka keshi» kontserti ótti, dep habarlaıdy QazAqparat tilshisi.

ShYU-ǵa múshe elderdiń ulttyq áýenderi ózbek naqyshynda oryndaldy.

«Mýzyka ár halyqtyń dástúrli mádenıetiniń ajyramas bóligi. Bul áýender tyńdarmannyń júregine jyly sezim uıalatady. ShYU halyqtarynyń mýzykalyq óneri jáne mádenıetimen etene tanysý – elder arasyndaǵy dostyqty nyǵaıtýǵa septigin tıgizetini sózsiz», - dep atap ótti ShYU-nyń Halyq dıplomatııasy ortalyǵynyń baspasóz qyzmeti.

Ózbekstannyń memlekettik fılarmonııasy zalynda «Sogdıana» ujymy qazaqtyń uly kompozıtory Qurmanǵazynyń «Balbyraýyn» kúıin oryndady.
Sondaı-aq, Hadısha Imomnazorova Shámshi Qaldaıaqovtyń ánderin shyrqady.