Tashkentte sheteldikter úshin 1 myń dollarlyq týrıstik paket ázirlenedi

TAShKENT. QazAqparat - Ózbekstan astanasynda sheteldik týrısterdi tartý úshin quny 1000 dollar turatyn qyzmetter paketi qalyptastyrylady. Bul týraly Prezıdent Shavkat Mırzıeev Tashkent ákimine týrızmdi damytý máselelerine arnalǵan keńeste tıisti tapsyrma berdi, dep habarlaıdy QazAqparat menshikti tilshisi Ózbekstan basshysynyń baspasóz qyzmetine silteme jasap.

«Tashkentke sheteldik týrısterdi kem degende 3 kúnge tartý jáne «1 myń dollarlyq qyzmetter paketin» usyný boıynsha jeke baǵdarlamany júzege asyrý mindeti qoıyldy», - dedi Shavkat Mırzıeev.

Týrısterdi tartý úshin jyl boıy jumys isteıtin akvaparkter, attraktsıondar men basqa da taqyryptyq parkter, táýlik boıy ashyq turatyn keminde 5 gastronomııalyq jáne saýda kósheleri, meıramhanalarda, qonaq úılerde, qoǵamdyq oryndarda jandy kontsertter, ashyq aspan astyndaǵy shoýlar (bı jáne mýzykalyq baǵdarlamalar) men festıvaldar (gúlder, balmuzdaq, mýzykalyq, gastronomııalyq) uıymdastyrý josparlanǵan.

«Osynyń arqasynda astanaǵa qosymsha 1 mln týrıst tartýǵa múmkindik bar», - dep atap ótti Shavkat Mırzıeev.

Buǵan deıin habarlaǵanymyzdaı, Ózbekstanǵa kelgen týrıster sany eki esege ósti.