Tashkentte sambodan álem chempıonatynda qazaqstandyq balýandar júldegerler qatarynan kórindi
ASTANA. KAZINFORM — Ózbekstan astanasy Tashkent qalasynda sambodan eresekter arasynda elýinshi álem chempıonaty ótip jatyr.
Qazaqstan sambo federatsııasynan málim etkenindeı, 6 qarasha — jarystyń alǵashqy kúni Nurıla Asanqyzy jaýyngerlik sambodan 88 keliden joǵary salmaqta kúmis medal jeńip aldy.
Nurıla 2024 jyly Astanada altyn alsa, ótken jyly Bishkekte qola júldege qol jetkizgen edi.
Sondaı-aq kórý qabileti zaqymdanǵan sportshylar arasynda Mıras Jarylqasyn (98 kg) men Gúlnaz Omarbek (50 kg) úzdik úshtikke ilikti.
Keshe júlde qory molaıa tústi. Sporttyq sambodan áıelder arasynda Gúldana Álmuhanbetova (54 kg) men Mádına Erjan (80 kg) qola medalmen marapattaldy. Al jaýyngerlik sambodan Jadyra Paıyz (50 kg) ben Arýjan Ásemqamalqyzy (72 kg) kúmis júldege qol sozdy.
Erler arasynda Jandos Beısenbaev sporttyq sambodan 64 kelige deıin salmaqta sońǵy básekede ǵana qarsylasyna ese jiberdi.
Nıethan Tóleýhan (71 kg) men Raıhan Mádı (98 kg) úshinshi oryndy qanaǵat tutty.
Júzden astam eldiń sportshylary qatysyp jatqan sambodan álem chempıonaty búgin máresine jetedi.
Eske sala keteıik, budan buryn Fatıma Supyǵalıevanyń bolashaqta Ýta Abe, Dıera Keldıerovamen kezdesýi múmkin ekendigi týraly aıtqanyn jazǵan bolatynbyz.
Sondaı-aq qazaqstandyq balýan Aıbatyr Mırazat kýrashtan álem chempıony atandy.
