Tashkentte parlamentaralyq yntymaqtastyqtyń ekinshi jahandyq forýmy ótti
Ózbekstan astanasynda BUU bekitken Turaqty damý maqsattaryn oryndaýdaǵy parlamentaralyq yntymaqtastyqtyń ekinshi jahandyq forýmy ótti, dep habarlaıdy Kazinform.
Atalǵan is-sharaǵa Parlamentaralyq odaq, Eýropadaǵy qaýipsizdik jáne yntymaqtastyq uıymy, TMD men Túrki memleketteriniń parlamenttik assambleıalarynyń jetekshileri, Ortalyq Azııa elderiniń depýtattary qatysty. Forým barysynda mamandar zań shyǵarýshy organdar arasynda ózara baılanysty nyǵaıtý, qoıylǵan maqsattarǵa birlese qol jetkizý jáne ózge elderdiń tájirıbesin negizge alý máselelerin talqylady.
«Tashkentte uıymdastyrylyp otyrǵan jahandyq forýmnyń negizgi mindeti – parlamentaralyq yntymaqtastyq aıasynda Turaqty damý maqsattaryn iske asyrý. Turaqty damý maqsattary BUU-nyń sessııasynda qabyldanǵan. Ony jalpyǵa ortaq damý ındıkatorlary desek bolady. Bizde parlamentaralyq assambleıalar bar. Solardyń sheńberinde Turaqty damý maqsattarynyń oryndalýy qandaı deńgeıde ekenin baǵamdap jatyrmyz. Naqty toqtalǵanda, bul aralyq esep berý jáne baǵytymyzdy taǵy da bir aıqyndap alý úshin kerek», - dedi QR Parlamenti Májilisiniń depýtaty Bolat Kerimbek.
Onyń aıtýynsha, birlesken jumystardyń nátıjesinde jastar isi, gendirlik teńdik, ekologııa baǵyttarynda ilgerileý baıqalyp otyr.
«Bul – Turaqty damý maqsattarynyń oryndalýyn qadaǵalaýǵa jáne kún tártibindegi ózekti máselelerdi talqylaýǵa negizdelgen tıimdi alań. Bizdiń elde zań shyǵarýshy organdardyń atqaryp jatqan jumystary osy maqsattardy oryndaýǵa baǵyttalǵan. Tıisinshe, ol halyqtyń ál-aýqatyn kóteredi. Prezıdent Qasym-Jomart Toqaev BUU-nyń 78-shi sessııasynda sóılegen sózinde Qazaqstan Turaqty damý maqsattaryn oryndaýǵa basymdyq beretinin erekshe atap ótken bolatyn», - dep toqtaldy QR Parlamenti Senatynyń depýtaty Olga Perepechına.
Forým qorytyndysy boıynsha ortaq qujat qabyldandy. Oǵan kún tártibindegi ózekti máseleler boıynsha usynystar engizildi.
