Tashkentte Ózbekstan men AQSh arasynda ǵylymı-tehnıkalyq yntymaqtastyq jónindegi Úkimetaralyq kelisimge qol qoıyldy

Beısenbi, 2 jeltoqsan kúni SІM qabyldaý úıinde AQSh pen Ózbekstan arasyndaǵy ǵylymı-tehnıkalyq yntymaqtastyq jónindegi Úkimetaralyq kelisimge qol qoıyldy. Qujatqa Amerıka Qurama Shtattarynyń Memlekettik hatshysy Hılları Klınton men Ózbekstan Respýblıkasy Premer-Mınıstriniń birinshi orynbasary, qarjy mınıstri Rýstam Azımov qol qoıdy.

Ózbekstannyń syrtqy ister mınıstrliginde aıtylǵandaı, Kelisim eki eldiń ǵylym jáne tehnologııa salalaryndaǵy joǵary oqý oryndary men jekemenshik kompanııalary, ǵylymı-zertteý ortalyqtary, memlekettik mekemeleri arasyndaǵy yntymaqtastyqtyń quqyqtyq aıasyna jol ashady.

Sondaı-aq AQSh-tyń Memlekettik hatshysy Ózbekstan Prezıdenti Islam Kárimovpen kezdesti.

Esterińizge sala keteıik, H.Klınton Astanadaǵy EQYU Sammıtine qatysqan soń Bishkekke sapar jasap, sodan keıin Tashkentke kelgen.