Tashkentte Ózbekctandaǵy isker qazaqtarǵa arnalǵan bıznes-forým ótti

TAShKENT. QazAqparat – Tashkentte Ózbekstanda turatyn isker otandastarǵa arnalǵan bıznes-forým ótti. Іs-shara «Otandastar qory» kommertsııalyq emes aktsıonerlik qoǵamy jáne Dúnıejúzi qazaqtarynyń qaýymdastyǵy, Qazaqstan Respýblıkasynyń Ózbekstandaǵy Elshiligi, «Atameken» Ulttyq kásipkerler palatasy jáne Ózbekstandaǵy qazaq mádenı ortalyǵynyń qoldaýymen uıymdastyryldy, dep habarlaıdy QazAqparat.

Bıznes-forýmnyń negizgi maqsaty – Ózbekstandaǵy qazaq dıasporasy ókilderimen iskerlik qarym-qatynas ornatý. Ózbekstandaǵy isker otandastardy aldymen Dúnıejúzi qazaqtarynyń qaýymdastyǵy tóraǵasynyń birinshi orynbasary Zaýytbek Turysbekov quttyqtady. Ol eki el arasyndaǵy ǵasyrlar boıy qalyptasqan baýyrlastyqty odan ári nyǵaıtý úshin iskerlik baılanystardy kúsheıtý kerektigin atap ótti. Sondaı-aq Dúnıejúzi qazaqtarynyń qaýymdastyǵy men Otandastar qory qyzmetteriniń negizgi baǵyttaryn, sheteldegi dıasporamen jumys isteý jónindegi negizgi jobalarǵa toqtaldy.

Al Ózbekstandaǵy qazaq mádenı ortalyǵynyń tóraǵasy Serikbaı Úsenov atalǵan eldegi qazaq dıasporasy ókilderiniń ekonomıkalyq múmkindikteri jaıynda sóz qozǵady. Ortalyq basshysy, sondaı-aq isker qandastardyń negizgi kásip salalaryn jáne Qazaqstanmen iskerlik baılanysty nyǵaıtý úshin aldymen saýda-sattyqty kúsheıtý qajet ekenin alǵa tartty.

Budan bólek, bıznes-forým barysynda Dúnıejúzi qazaqtarynyń qaýymdastyǵy tóraǵasynyń orynbasary Arǵyn Ospanov pen Otandastar qory Prezıdentiniń keńesshisi Bolat Dıdar sharaǵa qatysýshylarmen ózara is-qımyl tetikterin, shaǵyn jáne orta bıznes salasyndaǵy bıznes-bastamalardy yntalandyrý, sondaı-aq startaptardy qoldaý jáne damytý tetikterin egjeı-tegjeıli talqylady. Toqyma ónerkásibiniń, aýyl sharýashylyǵynyń, qyzmet kórsetý salasynyń damýyna, tehnologııalyq óndiristerdi qurýǵa negizdelgen Ózbekstan naryǵynyń beıinin eskere otyryp, osy salalarǵa basa nazar aýdaryldy. Forým qatysýshylaryna Qazaqstan oblystarynyń ınvestıtsııalyq áleýeti tanystyryldy.

Forým jumysyna 50-den astam adam qatysty. Olar ózderin qyzyqtyratyn startaptar, bıznes-bastamalar, qolda bar jobalar týraly aıtyp, spıkerlerge suraqtar qoıyp, bıznes josparlar men bastamalardy Qazaqstanda, sondaı-aq halyqaralyq naryqta jyljytý múmkindikterin talqylady.

«Otandastar qory Ózbekstanda turatyn qandastardyń usynystaryn tyńdaýǵa ashyq. Ári biz sheteldegi barlyq otandastarmen baılanystamyz. Bul rette kez kelgen ózekti máseleler boıynsha keńes berilip, aqparattyq qoldaý kórsetetin otandastar máseleleri jónindegi biryńǵaı baılanys ortalyǵy arnaıy qurylǵan» dedi forým sońynda Zaýytbek Turysbekov.

Eske sala keteıik, bundaı shetelderdegi bıznes-forým osymen tórtinshi ret ótip otyr. Aldaǵy ýaqytta 8 elde qazaqtarmen (GFR, AQSh, Ulybrıtanııa, Shvetsııa, Qytaı Halyq Respýblıkasy, Ózbekstan, Túrkııa jáne Reseı) bıznes-forým ótkizý josparlanǵan. Endigi bıznes-forým 2019 jyly 20 qyrkúıekte London qalasynda (Ulybrıtanııa) ótedi.

Aldaǵy forýmdar týraly barlyq aqparat Qordyń Facebook jáne Instagram áleýmettik jelilerindegi resmı betterinde bar. Budan basqa, bıznes-forýmdar týraly barlyq aqparatty otandastar suraqtary boıynsha tómendegi biryńǵaı baılanys ortalyǵyna qońyraý shalyp bilýge bolady: 1404; 8 800 080 1404; [phone]. Sonymen qatar Whatsapp jáne Telegram messendjerlerde 7 701 000 1404 nómiri boıynsha qońyraýlar qabyldanady.