Tashkentte oıyn-saýyq ortalyqtary, saıabaq pen dúkenderdiń jumysyna qoıylǵan shekteý alyndy
TAShKENT. QazAqparat – Ózbekstan astanasynda kún jylynyp, elektrmen jabdyqtaý máselesi jaqsarýyna baılanysty oıyn-saýyq ortalyqtary, saıabaq pen dúkenderdiń jumys ýaqytyna qoıylǵan shekteý alynyp tastaldy, dep habarlaıdy QazAqparattyń menshikti tilshisi.
Tashkent ákimdigi baspasóz qyzmetiniń málimetinshe, kún raıy qatty sýytyp ketýine baılanysty qala ákimshiligi 16 qańtardan bastap turǵyndardy elektr energııasy jáne gazben úzdiksiz qamtamasyz etý úshin barlyq saýda jáne qyzmet kórsetý oryndary, oıyn-saýyq ortalyqtary men saıabaqtardyń jumys kestesin qysqartýdy (10:00-nan 17:00-ge deıin) usyndy.
Tek azyq-túlik dúkenderi men qoǵamdyq tamaqtaný oryndarynyń jumysy ózgerissiz qalǵan bolatyn.
«Aýa temperatýrasy joǵarylap, jaǵdaı turaqtalǵandyqtan barlyq mekeme qyzmetin qalypty rejımde jalǵastyra alady», - dep habarlady astana ákimshiligi.
Buǵan deıin bıyl Ózbekstanda qys óte sýyq bolyp, el energııa daǵdarysyna ushyraǵany habarlanǵan.
Ózbekstan basshysy qysqa nashar daıyndalǵan birqatar laýazymdy sheneýnikti qyzmetinen bosatty.
Uzaqqa sozylǵan aıaz jáne respýblıka astanasy men óńirlerdegi kommýnaldyq júıe jumysynyń kúrdeli máselelerine baılanysty jylytý oryndary men dalalyq-áskerı ashana uıymdastyryldy.
Turǵyn úı qory energııasynyń tıimdiligin arttyrý maqsatynda Ózbekstan úkimeti 30 myńnan asa kópqabatty úıdi bazalt jabynmen jylytyp, olardy energııanyń balama kózderine aýystyrýdy kózdep otyr.
Foto: pikabu.ru
