Tashkentte Ortalyq jáne Ońtústik Azııa elderiniń ózara is-qımyl perspektıvasy talqylandy

TAShKENT. QazAqparat - Tashkent qalasynda «Ortalyq jáne Ońtústik Azııanyń ózara baılanysy: alǵysharttar, perspektıvalar, geostrategııalyq mańyzy» taqyrybyna arnalǵan halyqaralyq ǵylymı-tájirıbelik konferentsııa ótti. Ózbekstan Respýblıkasy Olıı Majlısiniń qoldaýymen uıymdastyrylǵan jıynǵa Qazaqstan Respýblıkasy Parlamenti Senaty tóraǵasynyń orynbasary Asqar Shákirov qatysty, dep habarlaıdy QazAqparat Senattyń baspasóz qyzmetine silteme jasap.

Asqar Shákirov Ortalyq jáne Ońtústik Azııa elderiniń saýda-ekonomıkalyq jáne ınvestıtsııalyq yntymaqtastyǵyn arttyrý qajettigin aıtty. Sondaı-aq, vıtse-spıker Ortalyq Azııa óńiriniń aıtarlyqtaı áleýetine erekshe nazar aýdardy. Qazirgi tańda 75 mln-nan astam adamdy qamtıtyn óńirdiń jyldyq jalpy jıyntyq ónimi shamamen 300 mlrd AQSh dollar. Al, syrtqy saýda aınalymy 145 mlrd dollardan asady.

Odan bólek, «Bir beldeý jáne bir jol», Transkaspıı halyqaralyq kólik dálizi, Eýrazııalyq ekonomıkalyq odaq sııaqty aýqymdy jobalar aıasynda qalyptasqan Eýrazııanyń ortalyǵyndaǵy kólik ıntegratsııasyna basa mán berildi.

Qazaqstan Prezıdenti Qasym-Jomart Toqaev bıyl 6 tamyzda ótken Ortalyq Azııa memleketteri basshylarynyń konsýltatıvtik kezdesýinde osy máselege toqtalǵan edi. Qazaqstan Prezıdenti sol kezdesýde Ortalyq Azııada kólik kommýnıkatsııalaryn damytý aımaq elderiniń jalpy ishki ónimin 15 paıyzǵa ósirýge múmkindik týǵyzatynyn aıtyp, ony asa zor rezerv dep atady.

Sondaı-aq, vıtse-spıker óńirlik qaýipsizdik problematıkasyna, atap aıtqanda, Aýǵanstandaǵy qazirgi jaǵdaıǵa nazar aýdaryp, bul máselede oń jaǵynan tanylǵan kelissóz alańdaryn belsendi paıdalanýǵa shaqyrdy.

«Inklıýzıvti memleket ıdeıasynyń ózektiligi joıylǵan joq. Másele áskerı jolmen sheshilmeıdi. Sondyqtan qarsy taraptar kelissózder júrgizý úshin bir ústeldiń basyna otyrýy kerek», – dedi Asqar Shákirov.

Sonymen qatar konferentsııa barysynda óńiraralyq ózara is-qımyldy turaqty damytý máseleleri sóz boldy. Ol úshin óńir elderiniń saıası-dıplomatııalyq, saýda-ekonomıkalyq jáne mádenı-gýmanıtarlyq yntymaqtastyǵyn arttyrý, osy baǵyttaǵy tıimdi tetikterdi ázirleýdiń mańyzy zor ekeni aıtyldy.

Jıynǵa qatysýshylar densaýlyq saqtaý jáne bıoqaýipsizdik máselelerin de talqylady. Bul baǵytta bolashaqta bıologııalyq qaýipterdiń aldyn alýǵa jáne qaýipti aýrýlar týraly málimetter almasýǵa yqpal etetin Halyqaralyq bıologııalyq qaýipsizdik jónindegi agenttik qurý týraly Qazaqstannyń bastamasy atap ótildi.