Tashkentte Ortalyq Azııa elderiniń syrtqy ister mınıstrleri kezdesti

NUR-SULTAN. QazAqparat – Qazaqstan, Qyrǵyzstan, Tájikstan, Túrikmenstan jáne Ózbekstan Syrtqy ister mınıstrleri Tashkentte ótetin Ortalyq Azııa memleketteri basshylarynyń ekinshi Konsýltatıvtik kezdesýine daıyndyq barysyn talqylady. Bul týraly QR SІM baspasóz qyzmeti habarlady.

Mınıstrler Ortalyq Azııa memleketteriniń basshylary konsýltatıvtik kezdesýiniń kún tártibin, birlesken málimdemesi men reglamentiniń jobalaryn naqty qarady. Sondaı-aq óńirlik ózara is-qımyldy odan ári nyǵaıtýdyń jaı-kúıi men perspektıvalary talqylandy.

Ortalyq Azııa baǵytyndaǵy mańyzdy ortaq jetistigi retinde Qazaqstannyń Tuńǵysh Prezıdenti – Elbasy Nursultan Nazarbaevtyń bastamasymen 2018 jylǵy 15 naýryzda Nur-Sultan qalasynda ótken OA memleketteri basshylarynyń Jumys (konsýltatıvtik) kezdesýi boldy. Bul – kóp jyldar ishindegi mundaı formattaǵy alǵashqy kezdesý bolyp, onyń barysynda óńir elderiniń kóshbasshylary besjaqty yntymaqtastyqtyń negizgi basymdyqtaryn anyqtap, bolashaqqa josparlar belgiledi.

QR Syrtqy ister mınıstri Muhtar Tileýberdi óz sózinde Ortalyq Azııa elderimen jan-jaqty kooperatsııalyq baılanystardy damytý jáne óńirdiń mańyzdylyǵyn nyǵaıtý Qazaqstannyń syrtqy saıasatynyń negizgi basymdyqtarynyń biri bolyp tabylatynyn atap ótti.

Kezdesý qatysýshylary ózbek tarapyna is-sharany sapaly uıymdastyrǵany jáne Ózbekstannyń aımaqtyq ıntegratsııany odan ári damytýǵa baǵyttalǵan kúsh-jigeri úshin alǵys bildirdi.