Tashkentte Nıkolaı II dáýirindegi 100 altyn tıyndy satpaq bolǵandar ustaldy
TAShKENT. KAZINFORM – Tashkentte XIX-XX ǵasyrlardaǵy 100 dana «Nıkolaı» altyn tıynyn 67 myń dollarǵa satpaq bolǵandar qolǵa tústOlardyń ústinen qylmystyq is qozǵaldy, dep habarlaıdy Gazeta.uz Memlekettik qaýipsizdik qyzmetine silteme jasap.
Tashkentte Memlekettik qaýipsizdik qyzmetiniń Ándijan oblysy boıynsha departamenti men keden organdarynyń qyzmetkerleri eki azamatty qolǵa túsirip, qamaýǵa aldy.
Habarlamada aıtylǵandaı, olar 100 altyn tıyndy 67 myń dollarǵa satpaq bolǵan. Sondaı-aq olardyń birine tıesili kólikten qosymsha 37 altyn teńge tabylǵan.
Sarapshylardyń qorytyndysyna sáıkes, taza salmaǵy 776 gramm bolatyn 5 jáne 10 rýbldik altyn monetalar nýmızmatıkalyq nysan retinde mádenı qazyna sanalady jáne kórkemdik-tarıhı qundylyqqa jatady.
Túpnusqalyq deńgeıi 900 jáne 916 bolatyn bul kóne monetalar 1897-1911 jyldar aralyǵynda soǵylǵan jáne olardyń jalpy quny 950 mıllıon somdy (shamamen 74 myń AQSh dollary) quraıdy.
Halyq tilinde «Nıkolaı» tıyndary degen atpen belgili bul tarıhı jáne materıaldyq qundylyqtardy Qyrǵyzstannyń Osh oblysyna aparyp satý josparlanǵany anyqtaldy.
Qazirgi tańda atalǵan tulǵalarǵa qatysty ÓR Qylmystyq kodeksiniń 177-babynyń 4-bóliginiń «a» tarmaǵy (Asa iri kólemdegi valıýtalyq qundylyqtardy zańsyz alý nemese berý) boıynsha qylmystyq is qozǵalyp, tergeý amaldary júrgizilip jatyr.
