Tashkentte Mırzo Ýlýgbektiń tapsyrmasy boıynsha jasalǵan biregeı qoljazba tanystyryldy
TAShKENT. QazAqparat – Tashkentte «Ózbekstannyń mádenı murasy – jańa Renessanstyń negizi» V Halyqaralyq kongresi aıasynda uly bıleýshi jáne ǵalym Mırzo Ýlýgbektiń tapsyrysy boıynsha arnaıy jasalǵan kóne manýskrıptiń faksımıldi basylymy usynyldy, dep habarlaıdy QazAqparat menshikti tilshisi.
«Qozǵalmaıtyn juldyzdar kitaby» astronomııalyq eńbegi - bul erekshe matematık, astronom jáne aǵartýshy ǵalym Mırzo Ýlýgbektiń buıryǵymen jasalǵandyǵy týraly sózsiz dálelderden turatyn erekshe qoljazba. Qoljazbanyń túpnusqalyǵy men tarıhı qundylyǵy kúmán týdyrmaıdy - onda Tsefeı shoqjuldyzy túrindegi Mırzo Ýlýgbek beınelengen mınıatıýra, altyn sııamen jazylǵan dóńgelek jazýlar jáne «taqtaǵy ǵalym» kitaphanasynyń basqa da belgileri bar.
Bul ejelgi qoljazbanyń faksımılesin aýstrııalyq Mueller&Schindler baspasy Ózbekstannyń mádenı murasyn zertteý, saqtaý jáne nasıhattaý jónindegi dúnıejúzilik qoǵammen birlesip jasaǵan.
Eńbektiń avtory ¬- Χ ǵasyrdyń ataqty astronomy jáne astrology Abd ar-Rahman ıbn Omar as-Sýfı. Ortaǵasyrlyq astronomııada «Qozǵalmaıtyn juldyzdar kitaby» shyn máninde dáýirlik jumysqa aınaldy jáne óziniń astronomııalyq kestelerin jasaý úshin jumys istegen ǵalym Ýlýgbekke kómek boldy. Bul qoljazba Mırzo Ýlýgbekke tıesili jáne onyń qolymen jasalǵan jazbalar bar. Qoljazbanyń túpnusqasy Frantsııanyń Ulttyq kitaphanasynda saqtaýly.
«Biz Frantsııanyń Ulttyq kitaphanasymen birinshi jyl birge jumys istep jatqan joqpyz, «Qozǵalmaıtyn juldyzdar kitaby» faksımılesi - bul bizdiń áriptestigimizdiń nátıjesine aınalǵan ekinshi basylym. Faksımıldi basylymdardyń qundylyǵy - túpnusqa qoljazbanyń qandaı ekendigin júz paıyz kórsete alady», - dedi Ózbekstannyń mádenı murasyn zertteý, saqtaý jáne nasıhattaý jónindegi dúnıejúzilik qoǵamnyń basqarma tóraǵasy Fırdavs Abdýhalıkov.
