Tashkentte meshitke Islam Karımovtyń esimi beriledi
ASTANA. QazAqparat - Tashkenttiń ejelgi meshitteriniń birine Ózbekstannyń tuńǵysh Prezıdenti Islam Karımovtyń esimi beriledi. Bul týraly 13 qyrkúıek, seısenbi kúni óziniń Facebook-taǵy paraqshasynda qaza tapqan memleket basshysynyń qyzy Lola habarlady.
«Ýlem men keń jurtshylyqtyń usynysy boıynsha «Islam ota» meshitiniń atyn ózgertý sheshimi qabyldandy», - dep atap ótti Lola Karımova.
Ol úsh júz jyldyq tarıhy bar qulshylyq orny 2015 jyly kóktemde tolyqtaı órtenip ketkenin eske aldy. Qalpyna keltirý jumystary 9 aı júrdi. Qurylys Karımovtyń qyzy men onyń kúıeýi Tımýr Tıllıaevtiń bergen qarajaty esebinen júzege asty, dep habarlady Lenta.rý.
Lolanyń aıtýynsha, meshit 560 oryndyq. «Kúmbez ishine, tóbeleri, qabyrǵalaryna Quran súreleri jazylǵan. Kitaphana, dáret alý bólmeleri bar», - dep qosty ol.
78 jastaǵy Karımovtyń qaıtys bolǵany 2 qyrkúıekte habarlandy. Kelesi kúni musylman salt-dástúri boıynsha Samarqandta jerlendi. Memleket basshysy 27 tamyzda ınsýlt alyp, aýrýhanaǵa jetkizilgen.
Islam Karımov 1991 jyldan bastap Ózbekstan Prezıdenti oryntaǵynda. Oǵan deıin 1990 jyldan bastap Ózbek KSR basqarǵan. Keńes ýaqytynda Ózbekstan KP OK Birinshi hatshysy, respýblıkanyń qarjy mınıstri bolǵan. Gúlnar, Lola esimdi eki qyzy bar.
