Tashkentte Maǵjan Jumabaevtyń ózbek tilindegi kitaby tanystyryldy
Atap aıtqanda, Álisher Naýaı atyndaǵy Tashkenttegi ózbek tili jáne ádebıeti memlekettik ýnıversıtetinde «Halyqaralyq túrkologııadaǵy ózbek tiliniń róli men yntymastastyqtyń keleshegi» atty ǵylymı konferentsııa ótkizildi. Atalmysh konferentsııada búkil túrki áleminiń rýhanı damýyna qatysty mańyzdy suraqtar talqylandy.
Konferentsııada Qazaqstan, Ózbekstan, Ázerbaıjan jáne Qyrǵyzstan elderiniń ǵylym ókilderi qatysty.
Shara barysynda alǵy sózben QR-nyń Ózbekstandaǵy Tótenshe jáne Ókiletti Elshisi Erik Ótembaev ortaǵa shyǵyp, atalǵan sıpattaǵy shara memleketter arasynda barlyq sala boıynsha tabysty yntymaqtastyqtyń alǵyshartyn jasaıtynyn atap ótti.
«Búgin biz Jibek jolynyń, jahandyq protsesterdiń qaıta órlep kele jatqanyn aıta alamyz. Men konferentsııaǵa qatysýshylardyń barlyǵyna úlken jetistikter tileı otyryp, basqosýlaryńyz tabysty bolsyn dep tileımin. Bizdiń kezdesýlerimizdiń barlyǵy ózara yntymaqtastyqtyń berik irgetasyn qalaıdy. Eń bastysy, ózderińiz biletindeı, QR Prezıdenti Nursultan Nazarbaev bizdiń rýhanı órleý protsesimizdi burynnan-aq jan-jaqty daıyndap keledi. Sondyqtan, meniń oıymsha, osy konferentsııada onyń «Rýhanı jańǵyrý» atty tolaǵaı eńbeginde aıqyn kórsetilgen negizgi baǵyttarymen tanysasyzdar», - dedi Erik Ótembaev.
Budan keıin sóz sóılegen Halyqaralyq Túrki akademııasynyń prezıdenti Darhan Qydyráli túrki halyqtarynyń mádenı jaqyndyǵy men rýhanı baılyǵy týraly sóz qozǵady.
«Bizdiń búgingi kezdesýimiz - búkil túrki elderiniń yntymaqtastyǵyn keńeıtý maqsatynda jasalǵan alǵashqy qadamdardyń biri. Biz Ózbekstannyń ǵalymdarynsyz túrki tarıhyn qalaı jaza alamyz nemese Ózbekstansyz túrki álemi týraly qalaı aıta alamyz? Sonymen qatar, biz Ózbekstan prezıdenti Shavkat Mırzıeevtiń Ózbekstannyń Túrki keńesine qatysatyny týraly aıtqan sózine óte qýanyshtymyz», - dedi Darhan Qydyráli.
Sonymen qatar, túrki elderiniń ǵylymı ortalarynyń kezdesýleri aıasynda belgili qazaq aqyny Maǵjan Jumabaevtyń ózbek tilindegi jınaǵynyń tanystyrylym ótti. Jınaqty ózbek jazýshysy Muzafar Ahmad ózbek tiline aýdaryp shyqqan. Kitaptyń saltanatty tanystyrylymyn QR-nyń Ózbekstandaǵy Tótenshe jáne Ókiletti Elshisi Erik Ótembaev pen Álisher Naýaı atyndaǵy Tashkenttegi ózbek tili jáne ádebıeti memlekettik ýnıversıtetiniń rektory Shýhrat Sırojıddınov ótkizdi.
Óz kezeginde Darhan Qydyráli Maǵjan Jumabaevtyń jınaǵynyń ózbek tiline aýdarylǵany úshin ózbek tarapyna zor alǵysyn bildirdi. Osyǵan baılanysty Muzafar Ahmad atqarǵan aýqymdy eńbegi úshin Halyqaralyq Túrki akademııasynyń medalimen marapattaldy. Sonymen birge, Halyqaralyq Túrki akademııasynyń medaline Maǵjan Jumabaevtyń shyǵarmashylyǵy týraly birqatar ǵylymı kontseptsııalar men zertteýler júrgizgen fılologııa ǵylymdarynyń doktory, professor Násimhan Rahmanov ıe boldy.
Konferentsııa barysynda sonymen qatar, Halyqaralyq Túrki akademııasy men Álisher Naýaı atyndaǵy Tashkenttegi ózbek tili jáne ádebıeti memlekettik ýnıversıteti arasynda yntymaqtyq jónindegi memorandýmǵa qol qoıyldy.
Konferentsııanyń sońynda qazaqstandyq delegatsııa Ózbekstan memlekettik óner mýzeıinde qazaqtyń uly oıshyly, aqyn ári aǵartýshysy Abaı Qunanbaevqa arnalǵan keshke qatysty. Atalǵan keshte sondaı-aq, Abaı Qunanbaev jaıly ózbek rejısseri Gııas Shermýhammedov túsirgen derekti fılm kórsetildi.
Qazaqstandyq ǵylymı delegatsııanyń quramyna aqyn, Qazaqstan Jazýshylar Odaǵynyń tóraǵasy Ulyqbek Esdáýlet, akademık, M.Áýezov atyndaǵy ádebıet jáne óner ınstıtýtynyń dırektory Ýálıhan Qalıjanov, S.Seıfýllın atyndaǵy mýzeı dırektory Nesipbek Aıtuly, QR Ortalyq memlekettik mýzeıiniń dırektory Nursan Álimbaı, «Maǵjan» kórkem-ádebı jýrnalynyń bas redaktory Jarasbaı Súleımenov, professor, fılologııa ǵylymdarynyń doktory Qulbek Ergóbek endi.
