Tashkentte keńse seıfinen 560 000 dollar urlaǵandardyń bireýi ustaldy

TAShKENT. KAZINFORM — Tashkenttiń Mırobod aýdanynda eki adam kompanııa keńsesinen ishinde 560 myń AQSh dollary bar seıfti urlap ketken. Bul týraly Tashkent qalalyq ishki ister bas basqarmasynyń baspasóz qyzmeti habarlady. 

Oqıǵa 22 maýsymǵa qaraǵan túni bolǵan. Kúdiktiler oqıǵa ornyna Gentra kóligimen kelgen. Olar kompanııa dırektorynyń kabınetine kirip, qujattaryn, flesh-kartasyn jáne 560 myń dollary bar seıfti urlap ketken.

Tártip saqshylary beınebaqylaý kamerasyndaǵy jazbalardy zerdeleý arqyly urylardy anyqtady.

Tártip saqshylary Ándijan qalasynda jasyrynbaq bolǵan kúdiktilerdiń birin ustady. Ol týystarynyń úıinde ustalyp, Tashkentke ákelindi.

Anyqtalǵandaı, seıfti ashqan quraldar osy tulǵalardyń úıinen tabylyp, seıf sýǵa laqtyrylǵan.

Kúdikti urlanǵan aqshanyń bir bóligin sybaılasyna bergenin aıtty. Ol «Honda» mototsıklin satyp alyp, Qyrǵyzstanǵa qashý úshin ózi 10 myń dollar alyp qalǵan.

ÓR Qylmystyq kodeksiniń 169-baby (urlyq) boıynsha qylmystyq is qozǵaldy. Qazir keltirilgen shyǵyn tolyǵymen óteldi. Mototsıkl tárkilendi.

Qazirgi ýaqytta tergeý amaldary júrgizilip jatyr.

Eske sala keteıik, Ózbekstan halqynyń úshten birinde aqsha jınaǵy joq.