Tashkentte Qazaqstannyń Halyqaralyq Araldy qutqarý qoryndaǵy tóraǵalyǵy joǵary baǵalandy
ASTANA. KAZINFORM — Tashkent qalasyndaǵy Ortalyq Azııa halyqaralyq ınstıtýtynda «Klımattyń ózgerýi jaǵdaıynda Ortalyq Azııa úshin sý qaýipsizdigin qamtamasyz etý» taqyrybynda halyqaralyq dóńgelek ústel ótti, dep habarlaıdy ÓzA.
Atalǵan is-sharanyń Halyqaralyq Araldy qutqarý qory bastamasymen 22 sáýir kúni Astana qalasynda ótetin sammıt qarsańynda uıymdastyrylýy onyń mańyzyn odan ári arttyra tústi.
Dóńgelek ústelde aımaq elderi men halyqaralyq uıym ókilderi klımattyń ózgerýi jaǵdaıynda sý resýrstary tapshylyǵy kúsheıip kele jatqanyn, bul másele endi tek ekologııalyq emes, strategııalyq qaýipsizdik faktoryna aınalǵanyn atap ótti. Ásirese, transshekaralyq ózender aǵysynyń azaıýy, muzdyqtardyń erýi jáne jaýyn-shashyn tártibiniń ózgerýi Ortalyq Azııadaǵy sý qamtamasyzdyǵyna eleýli áser etip otyrǵany aıtyldy.
Sarapshylardyń pikirinshe, qazirgi jaǵdaıda sý resýrstaryn utymdy, ádil ári tıimdi paıdalaný, sondaı-aq memleketaralyq yntymaqtastyqty kúsheıtý asa mańyzdy. Osy turǵyda Halyqaralyq Araldy qutqarý qory óńirdegi sý-ekologııa salasyndaǵy seriktestikti úılestiretin negizgi platforma retinde baǵalandy.
Іs-shara barysynda Qazaqstannyń qordaǵy tóraǵalyǵy aıasynda atqarylǵan jumystar joǵary baǵalandy. Jaqyn kúnderi tóraǵalyqty qabyldap alatyn Ózbekstannyń aldaǵy basym mindetteri de talqylandy. Sarapshylar Tashkent tóraǵalyǵy kezeńinde qor qyzmetin jańa deńgeıge kóterý, ásirese Aral teńizi alabyn qalpyna keltirýge baǵyttalǵan baǵdarlamalardy iske asyrýda praktıkalyq tásil kúsheıetinine úmit bildirdi.
Transshekaralyq sý resýrstaryn basqarý boıynsha halyqaralyq tájirıbeni engizý, óńirlik yntymaqtastyq tetikterin jetildirý jáne Aýǵanstandy sý dıalogyna tartý jóninde naqty usynystar ázirlendi. Bul usynystar Astana sammıtiniń kún tártibin qalyptastyrýda mańyzdy ról atqarýy yqtımal.
Otyrys sońynda qatysýshylar Ortalyq Azııada sý qaýipsizdigin qamtamasyz etý tek ortaq kózqaras pen ózara senimge negizdelgen yntymaqtastyq arqyly júzege asatynyn atap ótti. Osy turǵyda atalǵan kezdesý aımaq úshin mańyzdy saıası ári saraptamalyq alańǵa aınaldy.
Eske sala keteıik, Prezıdenttiń BUU Bas hatshysynyń Sý resýrstary jónindegi arnaýly ókilin qabyldaǵanyn jazǵan edik.
