Tashkentte Qazaqstannyń, Astanada Ózbekstannyń saýda ortalyǵy salynýy múmkin
TAShKENT. KAZINFORM – Elimizdiń Ózbekstandaǵy elshiligi osy elde jumys isteıtin qazaqstandyq kásipkerlermen kezdesý ótkizdi, dep habarlaıdy Kazinform agenttiginiń menshikti tilshisi.
Jıynda eki el arasyndaǵy ekonomıkalyq baılanystardy nyǵaıtýǵa serpin beretin jobalardy birlesip júzege asyrý múmkindikteri zerdelendi.
Ózbekstan saýda-ónerkásip palatasy tóraǵasynyń orynbasary Dılshod Rasýlov atap ótkendeı, byltyr kórshiles el Aqtaýda taratý ortalyǵyn ashqan. Ol arqyly resmı Tashkent aýyl sharýashylǵy ónimderin, onyń ishinde azyq-túlik taýarlaryn Qazaqstan naryǵyna shyǵarmaq. Sondaı-aq atalǵan habty ózge memleketterge eksporttalatyn ózbekstandyq ónimderdi ýaqytsha saqtaý úshin de qoldaný josparlanyp otyr.
- Buǵan qosa, byltyr jazda biz Qazaqstanda úkimetaralyq komıssııanyń otyrysyn ótkizdik. Onyń aıasynda Astana qalasynyń ákimimen kezdesý uıymdastyrylyp, memorandýmǵa qol qoıdyq. Ol qujatqa saı, ózbek tarapyna elordadan jer bólý jáne tıisinshe osyndaı tártippen Qazaqstan úshin Tashkent qalasynan jer berý josparlanǵan. Ol ýchaskelerge saýda ortalyqtary salýy tıis. Keıin sol arqyly ózbekstandyq taýarlardy Astanada, qazaqstandyq ónimderdi Tashkentte saýdalaý múmkindigi týady, - dep josparlaryn baıandady Dılshod Rasýlov.
Toqtala keteıik, búginde Ózbekstanda qazaqstandyq kapıtalmen myńnan astam kásiporyn jumys isteıdi. Bul rette eki el arasyndaǵy óńiraralyq baılanys nyǵaıyp keledi.
Eske salaıyq, byltyr Qazaqstan men Ózbekstan arasyndaǵy taýar aınalymy 4,2 mlrd dollardan asty. Qamtylyp otyrǵan kezeńde resmı Tashkent Astanaǵa 1,4 mlrd dollardyń taýaryn eksporttap, 2,8 mlrd dollardan astam somaǵa taýar ımporttaǵan.