Tashkentte qazaqstandyq jas fýtbolshylardyń ýlanǵany týraly aqparat tarady

Oqıǵa týraly ata-analar áleýmettik jelilerde jaza bastady. 

Jarysqa ulymen birge barǵan analardyń biri alǵashqy syrqattaný belgileri 30 qazandaǵy tańǵy astan keıin baıqalǵanyn aıtady.

— 31 qazanǵa qaraǵan túni balalardyń jartysynyń dene qyzýy kóterilip, ishi ótip, qusa bastady. Bir túnde 11 bala aıaq astynan aýyryp qaldy. Meniń ulym da syrqattandy: dene qyzýy kóterilip, ishi ótti. Keıin dál osyndaı belgiler basqa komandalardyń balalarynan da baıqaldy, — dedi Gúlnur esimdi ata-ana.

Onyń aıtýynsha, 1 qarashada jas fýtbolshy fınaldyq matchtarǵa qatysý úshin alańǵa shyǵa almaǵan. Ata-analar balalardyń jappaı syrqattanýyna olar turǵan qonaqúıdegi tamaq sebep bolýy múmkin dep topshylaıdy. Qonaqúıde tańǵy as shved ústeli júıesimen usynylǵan. Mázirde jumyrtqa men shujyq ta bolǵan.

Bul jaǵdaıǵa qatysty Qazaqstan Respýblıkasy Syrtqy ister mınıstrligi túsinikteme berdi.

— QR SІM Tashkent qalasynda ótip jatqan Dostlik Cup 2026 halyqaralyq fýtbol festıvaline qatysýshylardyń birqatarynyń densaýlyǵy kenetten nasharlaǵan oqıǵadan habardar. Medıtsınalyq kómekke muqtaj Qazaqstan azamattarynyń barlyǵy Ózbekstan Respýblıkasynyń mamandandyrylǵan medıtsınalyq mekemelerine jatqyzyldy. Olarǵa qajetti medıtsınalyq kómek kórsetilip jatyr, — dep habarlady vedomstvodan.

Mınıstrliktiń málimetinshe, qazaqstandyq dıplomattar zardap shekkenderdiń týystarymen jáne medıtsınalyq mekemelermen turaqty baılanysta. Jaǵdaı mınıstrliktiń baqylaýynda.

Fýtbolshylardyń biriniń anasynyń aıtýynsha, densaýlyǵy turaqty qatysýshylardy buryn josparlanǵandaı poıyzben emes, áýe reısteri arqyly Qazaqstanǵa qaıtarý uıymdastyrylyp jatyr. Al keıbir otbasylar ázirge Tashkentte qalyp otyr.

Buǵan deıin Almatyda Respýblıkalyq fızıka-matematıka mektebiniń 50-ge jýyq oqýshysy ýlanyp, aýrýhanaǵa túskeni habarlanǵan bolatyn.