Tashkentte qazaqstandyq balalardyń jappaı ýlanýyna qatysty qylmystyq is qozǵaldy

QARAǴANDY. KAZINFORM — Tashkentte ótken Dostlik Cup 2026 halyqaralyq fýtbol týrnırine qatysqan qazaqstandyq balalardyń jappaı ýlanýyna baılanysty Ózbekstanda qylmystyq is qozǵaldy. Zardap shekkenderdiń arasynda Qaraǵandy oblysynan jarysqa barǵan jas fýtbolshylar bar.

Tashkentte qazaqstandyq balalardyń jappaı ýlanýyna qatysty qylmystyq is qozǵaldy
Foto: Qazaqstannyń Ózbekstandaǵy elshiligi

Ózbekstan Respýblıkasy Bas prokýratýrasynyń habarlaýynsha, 1 qarashada Tashkenttegi qonaqúılerdiń birinde tańǵy as kezinde balalar men olardy ertip barǵan týystary shala pisken jumyrtqa men shujyq jegen. Arada kóp ýaqyt ótpeı, 13 adamnyń densaýlyǵy nasharlap, olardan qusý, ish ótý, ishtiń aýyrýy jáne dene qyzýynyń kóterilýi sııaqty belgiler baıqalǵan.

Ýlaný belgileri bar balalar men ata-analar jedel járdem brıgadalary arqyly Epıdemıologııa, mıkrobıologııa, juqpaly jáne parazıttik aýrýlar jónindegi respýblıkalyq mamandandyrylǵan ǵylymı-praktıkalyq medıtsınalyq ortalyqqa jetkizilgen.

Osy oqıǵaǵa baılanysty Chılanzar aýdanynyń prokýratýrasy Ózbekstan Qylmystyq kodeksiniń 276¹³-babynda kózdelgen sanıtarııalyq zańnama talaptaryn nemese epıdemııaǵa qarsy kúres qaǵıdalaryn buzý deregi boıynsha qylmystyq is qozǵaǵan.

Qazirgi ýaqytta Chılanzar aýdanynyń Іshki ister basqarmasy janyndaǵy tergeý bólimi oqıǵanyń mán-jaıyn anyqtaý úshin alǵashqy tergeý amaldaryn júrgizip jatyr.

Eske salaıyq, Qaraǵandy oblysynyń jas fýtbolshylary Tashkentke Dostlik Cup 2026 halyqaralyq týrnırine qatysý úshin barǵan. Óńir namysyn Jas Batir, Nomad Akademiya jáne Skaut atty úsh jekemenshik fýtbol mektebiniń tárbıelenýshileri qorǵaǵan.

Qazaqstannyń Ózbekstandaǵy elshiliginiń málimetinshe, medıtsınalyq kómekke barlyǵy 19 adam júgingen. Olardyń 17-si, onyń ishinde 11 bala men alty eresek adam aýrýhanaǵa jatqyzylǵan.