Tashkentte «Qazaqstan – taýlar men dala rýhy» atty kórme ashyldy
Elimizdiń Mádenıet jáne sport mınıstrliginiń aqparatyna sáıkes, kórme Ózbekstandaǵy Qazaqstan Respýblıkasy Elshiliginiń qoldaýymen «Rýhanı jańǵyrý» memlekettik baǵdarlamasy jáne TMD elderiniń yntymaqtastyq jónindegi kelisimine saı ulttyq kórkemdik shyǵarmashylyq jobalardy júzege asyrý maqsatynda ótip jatyr.
Іs-shara barysynda mýzeı qoryndaǵy ulttyq kórkem týyndylardyń eń úzdik úlgileri usynylady. Bul rette kórmege kórnekti qazaq keskindeme sheberleri Ábilhan Qasteev, Áýbákir Ysmaıylov, Moldahmet Kenbaev, Abram Cherkasskıı, Aısha Ǵalymbaeva, Gúlfaırýs Ismaılova, Salıhıtdın Aıtbaev, Janaı Shardenov, Sahı Romanov, Ábdirashıt Sydyhanov, Toqbolat Toǵysbaev, Qanafııa Teljanov, Bahtııar Tabıev, Arıı Shkolnyı, Asqar Esdaýletpen qatar ózbek sýretshileri - Oral Tańsyqbaev, Bahtıer Babaev, Vladımır Býrmakınniń týyndylary qoıylǵan.
Á.Qasteev atyndaǵy mýzeı osynaý kórme arqyly qazaq dalasynda 1930 jyldardan bastap qalyptasa bastaǵan kórkemóner mektebiniń erekshelikterin jetkizýge tyrysady. Máselen, kelýshiler dál sol qalyptasý kezeńindegi revolıýtsııalyq ózgerister, jańa álemniń qalyptasýy men halyqtar tarıhynan bastap, sımvolıkalyq jáne poetıkalyq óner úlgilerin tamashalaı alady.
Osy oraıda Ábilhan Qasteevtiń «Almatynyń jańa ǵımarattary», «Medeý muz aıdyny», Áýbákir Ysmaıylovtyń «Bes-Shatyr», Qanafııa Teljanovtyń «Kompozıtor S. Muhamedjanovtyń portreti», Moldahmet Kenbaevtyń «Alma-Ata mańyndaǵy taýlar», Uly Otan soǵysy jyldaryndaǵy kóptegen áıgili qazaq sýretshileriniń alǵashqy ustazy A.M. Cherkasskııdiń «Kóknár» ekspozıtsııasymen Jańataı Shárdenovtiń peızajdary, Ábdirashıt Sydyhanovtyń keskindemeleri, Aısha Ǵalymbaeva men Gúlfaırýs Ismaılovanyń sýretteri Qazaqstan tarıhynan syr shertedi.
Foto: www.facebook.com/kazembassytashkent
