Tashkentte Qazaqstan men Ózbekstan arasynda úkimetaralyq kelissózder ótti
ASTANA. QazAqparat - Tashkenttegi úkimetaralyq kelissózder barysynda eki jaqty qarym-qatynasty ári qaraı jandandyrý úshin QR Prezıdenti N. Nazarbaevtyń 2017 jylǵy qyrkúıektegi Ózbekstanǵa memlekettik sapary barysynda qol jetkizilgen kelisimderdiń mańyzdylyǵy atap ótildi.
«Memleket basshylary N. Nazarbaev pen Sh. Mırzıeevtiń kelisimderin praktıkalyq iske asyrý Qazaqstan-Ózbekstan qarym-qatynasyna sapaly jańa deńgeıdi qamtamasyz etedi», - dedi A. Mamın.
Kezdesý barysynda ónerkásip kooperatsııasy, agroónerkásip salasy, áskerı-tehnıkalyq, aeroǵarysh, tranzıttik-kólik salasyndaǵy yntymaqtastyqty ári qaraı damytý máseleleri talqylandy. Qashyqtyqtan zondtaý jáne jerserik baılanysy boıynsha qazaqstandyq jerserik tobynyń qyzmetterin usyný múmkindigi qaraldy, dep habarlaıdy primeminister.kz .
«Qazaqstan men Ózbekstan arasyndaǵy taýar aınalymy 2017 jylǵy 9 aıda 30% ósti jáne $1,5 mlrd qurady. Aǵymdaǵy jyldyń sońyna qaraı taýar aınalymy $2 mlrd quraıdy», - dedi A. Mamın jáne «2020 jylǵa qaraı áleýetti eskergende ózara saýda kólemin $5 mlrd deıin jetkizý qajet» ekenin basa aıtty.
Taraptar óńirlik jáne shekara mańyndaǵy yntymaqtastyqtyń qazirgi áleýetin - ekijaqty ózara is-qımyldyń mańyzdy baǵytyn jaqtap sóıledi.
Osyǵan baılanysty Ózbekstan Premer-Mınıstri A. Arıpov Óńiraralyq yntymaqtastyq forýmyn ótkizý ıdeıasyn qoldady, ol «eki el arasyndaǵy saýda-ekonomıkalyq baılanystardy ári qaraı damytýǵa negiz» bolady.
Suhbattasýshylar Qazaqstan men Ózbekstan arasynda dıplomatııalyq qatynastar ornaǵan kúnnen bastap 25 jyldyqty merekeleý boıynsha is-sharalar aıasynda ótip jatqan kezdesýdiń nyshandylyǵyn razylyqpen atap ótti.
2018 jyly Qazaqstanda Ózbekstan jylyn ótkizý josparlanǵan, ol eki eldiń tarıhı murasy men mádenı birliginiń baýyrlas sıpatyn kórsetedi.
Tashkentke sapar barysynda Qazaqstan men Ózbekstan arasyndaǵy ekijaqty yntymaqtastyq boıynsha úkimetaralyq komıssııanyń teń tóraǵalary - QR Premer-Mınıstriniń birinshi orynbasary A. Mamın men ÓR Premer-Mınıstriniń birinshi orynbasary A. Ramatovtyń jumys kezdesýi ótti.
Saýda-ekonomıkalyq baılanystardy damytýǵa, ózara saýda kólemderin ulǵaıtýǵa, taýarlar tizimdemesin keńeıtýge ekijaqty yntymaqtastyq jóninidegi Qazaqstan-Ózbekstan Úkimetaralyq komıssııasynyń qyzmeti septigin tıgizdi.
Kezdesý barysynda saýda-ekonomıkalyq yntymaqtastyqty odan ári damytýdyń ózekti máseleleri talqylandy, 16-shy úkimetaralyq komıssııa otyrysynda qol jetkizilgen kelisimderdi iske asyrýdyń tabystylyǵy atap ótildi.
Azyq-túlik ónimderi, hımııa jáne munaı hımııasy salalarynda saýda úıleri quryldy. Mashına jasaý jáne farmatsevtıkalyq salalarda saýda úılerin qurý boıynsha jumys júrgizilýde.
«Barynsha múmkin máseleler spektri boıynsha ózara tıimdi jáne tabysty yntymaqtastyqty kózdeý Qazaqstan-Ózbekstan qarym-qatynastaryna sapaly jańa mazmundy qamtamasyz etedi», - dedi QR Premer-Mınıstriniń birinshi orynbasary.
Jumys kezdesýiniń qorytyndysy boıynsha A. Mamın men A. Ramatov sáıkes Hattamaǵa qol qoıdy.
