Tashkentte ıslam órkenıetiniń tarıhyna arnalǵan halyqaralyq forým ótip jatyr
TAShKENT. KAZINFORM — Ózbekstan astanasynda «Islam órkenıeti: beıbitshilik, toleranttylyq jáne aǵartý» atty halyqaralyq forým ótip jatyr, dep habarlaıdy Kazinform agenttiginiń Tashkenttegi menshikti tilshisi.
Islam órkenıeti ortalyǵynda uıymdastyrylǵan is-sharǵa 50 memleketten kelgen 300-den astam sheteldik qonaq qatysyp otyr. Olardyń qatarynda memleket jáne qoǵam qaıratkerleri, mınıstrler, múftıler, ǵalymdar, tanymal ıslamtanýshylar jáne qoljazba murasyn zertteýshi mamandar bar.
Qatysýshylar ıslam órkenıetiniń tarıhy, mádenı murany saqtaý, tsıfrlandyrý, mádenı dıplomatııa, sondaı-aq Ózbekstanda júzege asyrylyp jatqan rýhanı-aǵartýshylyq reformalardy talqylap jatyr. Forýmda alǵash bolyp sóz alǵan kórshiles el prezıdentiniń keńesshisi Haırıddın Sýltanov Shavkat Mırzıeevtiń quttyqtaý hatyn oqyp berdi.
— Jańa Ózbekstan úshin úshinshi Renessanstyń berik negizin qalyptastyrýda zamanaýı bilim berý júıesin damytý aıryqsha mańyzǵa ıe. Osy maqsatta keıingi jyldary elimizde dinı-aǵartýshylyq salany odan ári jetildirý, ata-babalar murasyn zerdeleý jáne ǵylymı zertteýler júrgizý memlekettik saıasattyń basym baǵyttarynyń birine aınaldy, — delingen Shavkat Mırzıeevtiń qatysýshylarǵa joldaǵan quttyqtaý hatynda.
Forýmǵa Qazaqstan musylmandary dinı basqarmasynyń tóraǵasy Naýryzbaı qajy Taǵanuly, Túrki mádenıeti men murasy qorynyń prezıdenti Aqtoty Raıymqulova qatysyp otyr.
Aýqymdy is-shara 11 shildege deıin jalǵasady. Forým Tashkentten keıin Samarqand jáne Termez qalalarynda ótedi.
Qosa ketsek, buǵan deıin Túrkistan qalasy 2027 jylǵy Islam áleminiń mádenı astanasy mártebesine usynyldy.
