Tashkentte Irannyń ShYU-ǵa kirý algorıtmi kelisildi

TAShKENT. QazAqparat - Búgin Tashkentte Shanhaı Yntymaqtastyq Uıymyna (ShYU) múshe memleketter men Iran Islam Respýblıkasy ókilderiniń konsýltatsııalarynyń qorytyndysy boıynsha Hattamaǵa qol qoıý rásimi ótti.

Qujatta ırandyq taraptyń ShYU-ǵa múshe memleket mártebesin alý jónindegi mindettemeleri týraly memorandým jobasy maquldandy, dep habarlaıdy QazAqparat tilshisi.

«Iran sııaqty memlekettiń ShYU-yna kirýi «geografııalyq jaýapkershilikti» arttyrady, aımaqtyq yntymaqtastyqty damytý úshin jańa perspektıvalar ashady. Bizdiń Uıym ulan-ǵaıyr eýrazııalyq keńistikte keń qurlyqtyq yntymaqtastyqqa senimdi qadam basyp keledi. Bul aımaqtyq jáne jahandyq kún tártibindegi ózekti máselelerge jańasha kózqaraspen qaraýǵa múmkindik beretini sózsiz», - dedi Ózbekstan Syrtqy ister mınıstriniń orynbasary Vladımır Norov.

ShYU Bas hatshysy Chjan Mın beıne úndeýde taraptarǵa Irandy ShYU-ǵa qabyldaýǵa baǵyttalǵan qujattardy kelisý boıynsha jaqsy úılestirilgen jumysy úshin alǵys bildirdi.

Ol hattamaǵa qol qoıýdyń ótken jyly segiz memleket basshylarynyń Dýshanbedegi ShYU sammıtinde Irandy Uıymǵa múshelikke qabyldaý rásimin bastaý týraly sheshimin júzege asyrý jolyndaǵy praktıkalyq qadam ekenin atap ótti.

Bul úderistiń kelesi kezeńi bıylǵy jyldyń qyrkúıek aıynda Samarqandta ótetin ShYU sammıti aıasynda mindettemeler týraly memorandýmǵa qol qoıý jáne osy mindettemelerdi oryndaý bolmaq. Osydan keıin uıymǵa múshe elderdiń basshylary Iranǵa ShYU-ǵa múshe memleket mártebesin berý máselesin qarastyrady.

Sharaǵa ShYU-nyń turaqty jumys isteıtin organdarynyń basshylary, múshe memleketterdiń ulttyq úılestirýshileri, sondaı-aq Tashkenttegi dıplomatııalyq mıssııalardyń basshylary men ókilderi qatysty.

Mádıbek Jánibekov