Tashkentte Halyqaralyq zilzala qurbandaryn eske alý kúnine arnalǵan konferentsııa ótip jatyr
TAShKENT. KAZINFORM – Ózbekstan astanasynda 29 sáýir – Halyqaralyq zilzala qurbandaryn eske alý kúnine oraılastyrylǵan halyqaralyq konferentsııa ótip jatyr, dep habarlaıdy Kazinform agenttiginiń Tashkenttegi menshikti tilshisi is-shara ornynan.
2023 jyly 16 naýryzda ótken Túrki memleketteri uıymynyń kezekten tys sammıtinde Ózbekstan prezıdenti Shavkat Mırzıeev «Halyqaralyq zilzala qurbandaryn eske alý kúnin» bekitý týraly bastama kótergen edi.
Osy usynystyń negizinde byltyr sáýirde BUU Bas Assambleıasy 29 sáýirdi «Halyqaralyq zilzala qurbandaryn eske alý kúni» dep jarııalaý týraly qarar qabyldady. Tıisinshe, bıyl bul kún alǵash ret Ózbekstan astanasynda atalyp ótýde.
Іs-sharaǵa álemniń 25 elinen kelgen 200-ge tarta delegat qatysyp jatyr. Olardyń arasynda Ortalyq Azııa memleketteriniń tótenshe jaǵdaılar mınıstrleri, BUU ókilderi jáne halyqaralyq beldi uıymdardyń basshylary men seısmologtar bar.
Bul rette alǵash bolyp baıandama jasaǵan Ózbekstan premer-mınıstriniń orynbasary Achılbaı Ramatov zilzalany erte boljaý boıynsha respýblıkada atqarylyp jatqan jumystarǵa toqtaldy.
– Ǵylymı zertteýlerge sáıkes, el aýmaǵynyń 94%-y seısmıkalyq belsendiligi eń joǵary aımaq dep baǵalanyp otyr. Atap aıtqanda, jerlerdiń 3%-y – 9 ball, 23%-y – 8 ball, 28%-y – 7 ball, al 35%-ynda 6 baldyq jer silkinisi bolýy yqtımal. Sondyqtan seısmologııa salasyn damytýǵa asa mán beremiz. Osyǵan baılanysty keıingi 5 jylda onlaın-monıtorıng stantsııalarynyń sany 7 ese, ıaǵnı 35-ten 250-ge deıin kóbeıdi. Jahandyq seısmologııalyq monıtorıng júıesimen ıntegratsııa jasaý maqsatynda Seismo K5 baǵdarlamasy arqyly Qazaqstan, Qyrǵyzstan jáne Tájikstannyń 50 stantsııasymen onlaın rejımde tikeleı derek almasý mehanızmin jolǵa qoıyldy, - dedi Achılbaı Ramatov.
Sondaı-aq is-shara aıasynda sarapshylar men jaýapty vedomstvolar sheteldik ozyq tájirıbeni negizge ala otyryp, yntymaqtastyqty nyǵaıtý múmkindikterin talqylady.
Konferentsııanyń resmı ashylý saltanatynan keıin qatysýshylar birlesken sýretke túsip, Tashkentte ornalasqan jer silkinisi qurbandaryna arnalǵan «Jasorat» («Batyldyq») monýmentine gúl shoqtaryn qoıdy.
Eske sala keteıik, buǵan deıin Kazakh Tourism men Ózbekstannyń Ulttyq PR-ortalyǵy tarıhı memorandýmǵa qol qoıǵanyn jazǵan edik.
