Tashkentte «Erekshe» jáne «Meniń úlken qazaq otbasym» qazaqstandyq fılmderi kórsetildi

ASTANA. KAZINFORM — Ózbekstan astanasynda ótip jatqan Qazaqstan kınosy kúnderi aıasynda otandyq eki fılmniń kórsetilimi ótti. Іs-shara Qazaqstan Respýblıkasy Táýelsizdiginiń 35 jyldyǵyna oraı uıymdastyryldy. 

Tashkentte «Erekshe» jáne «Meniń úlken qazaq otbasym» qazaqstandyq fılmderi kórsetildi
Foto: Kazinform

Uıymdastyrýshylar qatarynda QR Mádenıet jáne sport mınıstrligi, Ózbekstan Respýblıkasy Mádenıet mınıstrligi janyndaǵy Kınematografııa agenttigi, «Ózbekfılm» kınotserni, Sh.Aımanov atyndaǵy «Qazaqfılm» ulttyq kınostýdııasy, Tiger Films prodıýserlik stýdııasy, Kinopark Theatres kompanııasy jáne Qazaqstannyń Ózbekstandaǵy Elshiligi bar.

«Erekshe» fılmi - paralımpıadalyq sport túri bochchaǵa arnalǵan alǵashqy qazaqstandyq týyndy. Fılmde mahabbat pen adaldyq, rýh kúshi men jeńiske degen jiger, sondaı-aq álemdi ózgertýdi ár adam aldymen ózinen bastaýy kerektigi baıandalady. Al «Meniń úlken qazaq otbasym» fılminiń negizinde dostyq, halyq birligi, otbasylyq qundylyqtar men mahabbat taqyryptary qozǵaldy.

ch
Foto: Kazinform

Eki fılmdi de basty rólderdi somdaǵan tanymal akterler Baýyrjan Rasýl, Dına Tasbýlatova jáne Danıel Djeıms, sondaı-aq Tiger Films kompanııasynyń bas dırektory Erlan Býharbaev tanystyrdy.

– Táýelsiz Qazaqstan kınosyn Ózbekstanda tanystyrý biz úshin úlken qýanysh ári mártebe. Ózbekstandyq kórermenderdiń kórsetilimderge kelip, fılmderimizdi qyzyǵýshylyqpen tamashalap jatqanyn kórip otyrmyz. Sońǵy jyldary Ózbekstanda qazaqstandyq kınoǵa degen qyzyǵýshylyq edáýir artty. Sol sııaqty Qazaqstanda da ózbek kınosynyń tanymaldyǵy ósip keledi. Bul oń úrdis bizdi qýantady, – dedi Tiger Films kompanııasynyń bas dırektory Erlan Býharbaev.

«Erekshe» jáne «Meniń úlken qazaq otbasym» fılmderinen bólek, Tashkentte Qazaqstanda túsirilgen taǵy tórt týyndy kórermen nazaryna usynylady. Olardyń qatarynda «Qaitadan» apat týraly fılmi (rejısseri - Dýman Erkinbek), «Jabaıy» otbasylyq fılmi (rejısseri - Damır Ábilhanov), «Altyn adam» anımatsııalyq fılmi (rejısserleri – Turdybek Maıdan men Tilek Tóleýǵazy) jáne «Ámire» bıografııalyq dramasy (rejısseri – Djeffrı Vespa) bar.

Aıta keteıik, Qazaqstan «Brıllıantovaıa babochka» kınosyılyǵynyń eki júldesin jeńip aldy.