Tashkentte ekstremıst-áıelder daıarlaıtyn mektep áshkerelendi
ASTANA. 12 maýsym. QazAqparat - Tashkentte áıelderdi estremıstik kózqarasqa tárbıeleý qyzmetimen aınalysqan jergilikti áıel ustaldy, dep habarlady Lenta.rý quqyq qorǵaý organdaryndaǵy derekkózge silteme jasaǵan 12uz.com saıty málimetterine súıene otyryp.
Ótken jyly kúıeýi dinı «Hızb-ýt-Nýsrat» ekstremıstik uıymyna qatysy úshin toǵyz jylǵa sottalǵan adamnyń Lola Ahmedjanova degen áıeli ekstremıst-áıelder daıarlaýmen aınalysqan. Jubaıynyń nusqaýymen ol tóńiregine dinı senimdegi áıelderdi toptastyryp, olarǵa dinı sabaq berýmen aınalysqan.
Derekkózdiń aıtýynsha, alǵashqy kezde ıslam dinine jáne arab jazýyn oqýǵa kóńil bólingen. Bara-bara «Hızb-ýt-Tahrır» jáne «Hızb-ýt-Nýsrat» ekstremıstik uıymdarynyń estremıstik kózqarastaryna qaraı aýysqan. Oqytý úshin ol jamaǵattarynan aqsha alǵan, al aqysyn tóleı almaıtyndar onyń baqshasynda jumyspen ótegen.
Psıhologııalyq yqpal jasalǵannan keıin áıelder ózderiniń «tálimgeriniń» nusqaýlaryn bujytpaı oryndap otyrǵan. «Áıelder men balalar, sonyń ishinde kámeletke tolmaǵandar hıdjap kıgen, olarǵa mektepte sabaq oqýǵa, oıyn-saýyq telebaǵdarlamalaryn kórýge, týǵan kúnderin atap ótýge tyıym salynǵan. Eń qaýiptisi, eresekterge de, balalarǵa da ateıster men basqa dinderdi tutynatyn adamdarǵa óshpendilik sezimin ekken», dep atap ótti quqyq qorǵaý organynyń ókili.
«Ekstremıst-áıelder mektebi» birneshe jyl boıy jumys istegen, onda birneshe ondaǵan áıelder tálim alǵan. Olardyń odan keıingi taǵdyry naqtylanbaǵan.
Qazirgi kezde Ahmedjanova men onyń sybaılas serikterine qatysty tergeý amaldary júrgizilýde.
