Tashkentte Ekonomıkalyq yntymaqtastyq uıymynyń kezekti sammıti bastaldy

Tashkentte Ózbekstan Respýblıkasynyń Prezıdenti Shavkat Mırzıeevtiń tóraǵalyǵymen Ekonomıkalyq yntymaqtastyq uıymynyń (EYU) 16-shy sammıti bastaldy, dep habarlaıdy Kazinform.

Jıyn aldynda uıymǵa qatysýshy elderdiń basshylaryn qarsy alý jáne sýretke túsý rásimderi ótip jatyr. 

Sammıtke Ázerbaıjan prezıdenti Ilham Álıev, Iran basshysy Ibrahım Raısı, Qyrǵyz Respýblıkasynyń prezıdenti Sadyr Japarov, Tájikstan memleketiniń basshysy Emomalı Rahmon, Túrikmenstan prezıdenti Serdar Berdimuhamedov, Túrkııa eliniń basshysy Rejep Taııp Erdoǵan, Qazaqstannyń premer-mınıstri Álıhan Smaıylov, Pákistan ýaqytsha úkimetiniń basshysy Anvar ýl-Hak Kakar jáne EYU-nyń Bas hatshysy Hýsrav Nozırı qatysyp otyr. 

Otyrysta saýda-ekonomıkalyq, ınvestıtsııalyq, kólik-kommýnıkatsııalyq jáne gýmanıtarlyq yntymaqtastyqty odan ári nyǵaıtý, sondaı-aq EYU-nyń qyzmetin jetildirý máseleleri talqylanady. 

Aıta keteıik, EYU – 1985 jyly Ortalyq Azııa jáne Taıaý Shyǵys elderiniń bastamasymen qurylǵan memleketaralyq aımaqtyq uıym. Ol Iran, Pákistan jáne Túrkııa memleketteri arasynda qol qoıylǵan Izmır shartynyń negizinde jumys isteıdi. 1992 jyldan keıin atalǵan uıymnyń qyzmeti jandana tústi. Óıtkeni, osy jyly oǵan Qazaqstan, Ázerbaıjan, Tájikstan, Túrikmenstan, Aýǵanstan, Qyrǵyz Respýblıkasy jáne Ózbekstan elderi qosyldy.