Tashkentte eki myń oryndyq kovıd ortalyqtary ashylmaq
TAShKENT. QazAqparat – «Qyzyl» aımaqtaǵy Ózbekstannyń astanasynda COVID-19 juqtyrǵan naýqastarǵa arnalǵan bóliný ortalyqtary jumysyn qaıta jandandyrady, dep habarlaıdy QazAqparattyń menshikti tilshisi.
Astana ákimdiginiń dereginshe, Tashkentte «Ýzekspotsentr» kórme ortalyǵy, «Ýnıversal» jáne «Ëshlık» sport keshenderiniń bazasynda ornalasqan kovıd ortalyqtary jumysyn jandandyrmaq.
Mundaı tapsyrmany qala basshysy Djahongır Artykhodjaev «Ëshlık» sporttyq-saýyqtyrý keshenine barý barysynda berdi. Ol jerde búginnen bastap 504 tósek oryn men 60 naýqasqa arnalǵan jansaqtaý bólimi bar kovıd ortalyǵy ashyldy.
Sonymen qatar osy aptanyń sońyna deıin «Ýnıversal» sport kesheninde 770 oryndyq jáne «Ýzekspotsentr» kórme ortalyǵynda 700 naýqasqa arnalǵan bóliný ortalyqtarynyń ashylýy josparlanyp otyr. Jalpy alǵanda, Tashkentte 2 myń naýqasqa arnalǵan tósek oryn daıyndalady.
Budan buryn Tashkentte kovıd ortalyqtary pandemııanyń birinshi tolqyny kezinde ashylǵan bolatyn, degenmen keıinnen juqtyrý oqıǵalarynyń azaıýyna baılanysty 2020 jyldyń jeltoqsanynda jabylyp qaldy.
Eske sala keteıik, epıdemıologııalyq ahýaldyń órshýine baılanysty Ózbekstanda 28 maýsymnan bastap karantınk sharalar kúsheıtilgen. Ózbekstan astanasy eki aptalyq karantınge jabylǵan.
Mádıbek Jánibekov
