Tashkentte aýrýhanaǵa túsken qaraǵandylyq balalar týraly jańa derek shyqty
QARAǴANDY. KAZINFORM — Tashkentte ótken Dostlik Cup 2026 halyqaralyq týrnırine Qaraǵandy oblysynan barǵan jas fýtbolshylardyń qaı sport mektepteriniń atynan qatysqany belgili boldy. Óńirlik dene shynyqtyrý jáne sport basqarmasynyń málimetinshe, qazir Ózbekstan astanasyndaǵy aýrýhanada 28 adam, onyń ishinde 16 bala em qabyldap jatyr.
Qaraǵandy oblysynyń dene shynyqtyrý jáne sport basqarmasynyń habarlaýynsha, halyqaralyq týrnır 28 qazan men 2 qarasha aralyǵynda uıymdastyrylǵan. Oǵan óńir atynan «Jas Batir», «Nomad Akademiya» jáne «Skaut» jekemenshik fýtbol mektepteriniń komandalary qatysqan. Jas sportshylar 2014, 2018 jáne 2019 jyly týǵan balalar arasyndaǵy úsh jas sanatynda synǵa túsken.
Týrnırge Qaraǵandy oblysynan barlyǵy 60 bala, 32 ata-ana jáne tórt jattyqtyrýshy barǵan. Sapar shyǵyndary jeke qarajat esebinen ótelgen.
Basqarmanyń málimetinshe, qazirgi ýaqytta Tashkent qalasyndaǵy № 5 qalalyq ınfektsııalyq aýrýhanada 16 bala, bir jattyqtyrýshy jáne 11 ata-ana emdelip jatyr. Olardyń barlyǵy G’ayrat Hoji ota hotel qonaqúıinde turyp, tamaqtanǵan.
Buǵan deıin jas fýtbolshylardyń ata-analary áleýmettik jelilerde balalardyń jappaı syrqattanǵany týraly habarlaǵan. Analardyń biriniń aıtýynsha, balalardyń densaýlyǵy 30 qazanda tańǵy astan keıin kúrt nasharlaǵan.
Olardyń dene qyzýy kóterilip, qusý jáne ish ótý belgileri baıqalǵan. Ata-analar buǵan qonaqúıde berilgen taǵam sebep bolýy múmkin dep topshylaǵan.
Buǵan deıin Qazaqstannyń Syrtqy ister mınıstrligi týrnırge qatysýshylardyń aýrýhanaǵa túskenin rastaǵan edi. Vedomstvonyń habarlaýynsha, qazaqstandyq dıplomattar zardap shekkenderdiń jaqyndarymen jáne Ózbekstannyń medıtsınalyq mekemelerimen turaqty baılanysta.
