Tashkentte aýany lastaǵan 100-den astam nysannyń jumysy toqtatyldy

TAShKENT. KAZINFORM – Ózbekstan prezıdentiniń jarlyǵymen qurylǵan arnaıy komıssııa aýany lastap jatqan Tashkent qalasy men oǵan irgeles aýmaqtardaǵy nysandarǵa tekseris júrgizip jatyr, dep habarlaıdy Kazinform agenttiginiń menshikti tilshisi.

Ekologııa komıtetiniń málimetinshe, 24 qarashadan bastap jedel top músheleri 1 449 jylyjaıǵa reıd júrgizdi. Tıisinshe, 67 nysannyń jumysy toqtatylyp, 403 adamǵa qatysty ákimshilik hattama toltyryldy.

Sondaı-aq, Tashkentte 6,3 gektar aýmaqty qamtyp jatqan 53 zańsyz qurylys nysany anyqtalyp, olardyń 34-i jumysyn ýaqytsha toqtatty. Buǵan qosa, aýany lastap jatqan ǵımarattardy turǵyzyp jatqan 188 adam ákimshilik jaýapqa tartyldy.

Munymen birge, júktiń betin jappaı tasymaldap, kóshede shań kótergen 837 júrgizýshige ákimshilik hattama toltyryldy.

Buǵan deıin habarlaǵanymyzdaı, Tashkent qalasynda aýa sapasy nasharlap barady. Atap aıtqanda, búgin aýanyń lastanýy Dúnıejúzilik densaýlyq saqtaý uıymy bekitken standarttan 41 ese asyp tústi. Ekologııalyq ahýaldyń nasharlaýyna baılanysty Ózbekstan bıligi shuǵyl sharalar qabyldaýǵa kiristi. 25 qarashada el prezıdenti Shavkat Mırzıeevtiń jarlyǵymen Tashkenttegi aýa sapasyn jaqsartý baǵytyndaǵy jobalardy iske asyratyn arnaıy komıssııa quryldy.