Tashkentte Astananyń 20 jyldyq mereıtoıyna arnalǵan dóńgelek ústel ótti
Merekelik is-sharaǵa Ózbekstan Respýblıkasynyń memlekettik jáne saıası qaıratkerleri, úkimettik emes uıymdar men sheteldik dıplomatııalyq korpýstyń ókilderi qatysty.
Otyrysty Qazaqstannyń Ózbekstandaǵy Tótenshe jáne Ókiletti Elshisi Erik Ótembaev ashty. Elshi sózinde Astananyń qalyptasý kezeńderi, qazirgi Qazaqstannyń jaǵdaıy men damý bolashaǵy týraly aıtty.
Ózbekstan Respýblıkasy Olıı Majlıs zań palatasy spıkeriniń orynbasary Borıı Álıhanov barlyq qazaqstandyqtardy Astananyń mereıtoıymen quttyqtady.
«Astana qalasyna barǵan kez kelgen adam jigerlenip qaıtady. Men bul eldi mekenniń tarıhyna qyzyǵýshylyq tanyttym. Gerodottyń ózi birinshi myńjyldyqta sol jerdi sıpattaǵan. Keıin bul eldi meken Uly Jibek jolyndaǵy Bozoq dep atalǵan. Qazaqstan Prezıdenti «Eýrazııa júreginde» atty kitabynda jańa elordanyń qandaı jalpyulttyq ıdeıalarǵa negizdelip, tańdalǵanyn atap ótken edi. Ol 32 faktordy keltirgen. Sondyqtan, Astana qazirgi Qazaqstannyń sımvoly men brendine aınalyp otyr», - dep atap ótti Borıı Alıhanov.
Ózbekstan Respýblıkasy Saýda-ónerkásip palatasynyń tóraǵasy Adham Ikramov Qazaqstan astanasynyń qaryshtap damyp jatqanyn tilge tıek etti.
Dóńgelek ústelge qatysýshylar pikirtalas barysynda Astananyń damý bolashaǵy týraly áńgimelep, Qazaqstan ortalyǵynda ornalasqan iri megapolıstiń qalyptasý mańyzdylyǵyn atap ótti jáne qalanyń qaıtalanbas sáýlet stıline nazar aýdardy. Qatysýshylar Qazaqstan Respýblıkasynyń Prezıdenti N.Á.Nazarbaevtyń Qazaqstan astanasynyń ımıdjin qalyptastyrýdaǵy aıryqsha rólin atap ótti.
