Tashkentte áskerılerdiń qoıan-qoltyq urys chempıonaty ótedi

TAShKENT. QazAqparat - Ózbekstan astanasynda alǵash ret TMD memleketteriniń áskerı qyzmetshileri arasynda armııalyq qoıan-qoltyq urys boıynsha chempıonat ótedi, dep habarlaıdy QazAqparat.    

Saıysqa Qazaqstan, Ózbekstan, Reseı, Qyrǵyzstan, Tájikstan jáne Belarýs komandalary men tóreshileri qatysady.

«2017 jyly Ózbekstan TMD memleketteriniń Qorǵanys mınıstrleri keńesi janyndaǵy sport komıtetiniń tolyq quqyly múshesi atandy. Alǵash ret armııalyq qoıan-qoltyq urys chempıonatyn ótkizý mártebesi berilip otyr», - dep atap ótti Ózbekstan qorǵanys mınıstrliginiń ókili Azız Haıdarov.

Atalǵan chempıonatta Qazaqstan 7 salmaq kategorııasynda (60 keliden 90 kelige deıin) saıysqa túsedi. Komanda quramynda TMD chempıonattarynyń birneshe dúrkin jeńimpazdary men júldegerleri kishi serjant Erzat Seterbaev pen qatardaǵy jaýynger Jasulan Músirkenov bar.