Tashkentte ánshi Farrýh Zakırovke Qazaqstan Prezıdenti atynan «Dostyq» ordenin tabystaý saltanaty ótti
TAShKENT. KAZINFORM — Qazaqstannyń Ózbekstandaǵy elshiliginde «ıAlla» ansambliniń kórkemdik jetekshisi Farrýh Zakırovke ІІ dárejeli «Dostyq» ordenin saltanatty tabystaý rásimi ótti, dep habarlaıdy Kazinform agenttiginiń Tashkenttegi menshikti tilshisi.
Aıta keteıik, 16 sáýirde Memleket basshysy Qasym-Jomart Toqaev Qazaqstan men Ózbekstannyń Halyq ártisi Farrýh Zakırovti 80 jasqa tolýymen quttyqtap, «Dostyq» ordenimen marapattaǵan edi.
Farrýh Zakırovke nagradany tabystaý saltanatynda qazaqstandyq dıplomattar óner maıtalmanynyń mádenıet pen mýzykany damytýǵa, sondaı-aq halyqtar arasyndaǵy dostyqty nyǵaıtýǵa qosqan erekshe úlesin atap ótti.
Óz kezeginde áıgili «ıAlla» ansambliniń kórkemdik jetekshisi kórsetilgen qurmet úshin qazaq halqyna alǵysyn bildirdi.
— Maǵan kórsetilgen joǵary qurmetti bútin ózbek halqyna bildirgen iltıpat dep baǵalaımyn. Bul — prezıdentterdiń Ózbekstan men Qazaqstan arasyndaǵy mádenı-gýmanıtarlyq baılanystardy damytýǵa erekshe nazar aýdaratynyn ańǵartady. Baýyrlas elder arasyndaǵy ózara yntymaqtastyqty, senimdi jáne tatý kórshilikti óner arqyly nyǵaıtýǵa kúsh salý — men úshin mártebe. Mádenıet aldaǵy ýaqytta da bizdiń halyqtarymyzdyń odan ári jaqyndasýyna yqpal etetin dostyq kópiri bolatynyna senimdimin, — dedi Farrýh Zakırov.
Ónerimen halyqtar júreginen oryn tapqan Farrýh Zakırov Ózbekstan, Qazaqstan, Qyrǵyzstan, Tájikstan, Ázerbaıjan, Tatarstan, Bashqurtstan jáne Ingýshetııanyń Halyq ártisi joǵary ataǵyna ıe bolǵan.
Sonymen qatar ánshiniń mereıtoıy Ózbekstanda da keń kólemde atalyp ótildi. Kórshiles el prezıdenti Shavkat Mırzıeev Farrýh Zakırovtiń mádenıetti damytýǵa jáne halyqtar arasyndaǵy dostyqty nyǵaıtýǵa qosqan úlesin joǵary baǵalap, «Býıýk hızmatları ýchýn» («Uly qyzmetteri úshin») ordenimen marapattady.
Eske salaıyq, taıaýda Buharada ótken Qasym-Jomart Toqaev pen Shavkat Mırzıeev arasyndaǵy beıresmı kezdesýde prezıdentter mádenı-gýmanıtarlyq baılanystardy tereńdetýge ýaǵdalasqan edi.
