Tashkentte Almatynyń týrıstik áleýeti tanystyryldy

TAShKENT. QazAqparat – Ózbekstan astanasynda Almatynyń týrıstik múmkindikteri tanystyrylǵan roýd-shoý ótti, dep habarlaıdy QazAqparat tilshisi.

Qazaqstannyń Ózbekstandaǵy elshisi Beıbit Atamqulov quttyqtaý sózinde týrızm eki eldiń ekonomıkalyq ósimi men qazaq jáne ózbek halyqtarynyń mádenı birliginiń mańyzdy quramdas bólikteriniń biri ekenin atap ótti. Týrızm múmkindikterin damytý úshin eki eldiń týrızm sektory ókilderi arasynda tikeleı baılanys ornatý qajet.

«Bul is-shara ózbek kompanııalarynyń Qazaqstannyń týrıstik áleýeti týraly kóbirek bilýi úshin uıymdastyrylǵan. Almaty ásirese tanymdyq, mádenı, ekologııalyq jáne iskerlik týrızmdi unatatyn týrısterdi qyzyqtyrady. Máselen, turǵyndar «demalys kúngi týrızm» sııaqty baǵytqa qyzyǵýshylyq tanytady, ol – shopıng-týrızm, gastronomııalyq týrızm, medıtsınalyq týrızm jáne taý týrızmi. Maman retinde sizderdiń týrıstik paketterdi jasap, qyzyǵýshylyq tanytqan azamattarǵa usyna alatyndaryńyzǵa senimdimin», – dedi Beıbit Atamqulov.

Almaty qalasy ákimdiginiń týrızmdi ilgeriletý bóliminiń basshysy Erkebulan Ábihan qonaqtarǵa eldiń qarjy, ekonomıkalyq, mádenı jáne jastar ortalyǵy sanalatyn ońtústik astanasynyń týrıstik-ınvestıtsııalyq áleýetiniń tusaýkeserin usyndy.

«Biz Ózbekstannan keletin týrısterdiń qyzyǵýshylyǵy únemi artyp otyratyndyqtan, bul sharany Tashkentte ótkizýdi uıǵardyq. Osy jyldyń birinshi jartyjyldyǵynda ǵana Almatyǵa 120 myńǵa jýyq sheteldik týrıst keldi, onyń 18 myńy – Ózbekstannan kelgen qonaqtar. Búgin ózbek astanasynyń týrızm ındýstrııasyndaǵy áriptestermen kezdesý ótti. Biz ózbek áriptesterimizdi Almatynyń týrıstik áleýetimen tanysý úshin gastronomııalyq, ekologııalyq, taý festıvalderine, qonaqúı forýmdaryna jáne basqa da mádenı-buqaralyq is-sharalarǵa qatysýǵa qyzyqtyrýdy josparlap otyrmyz. Bul týrıster aǵynynyń artýyna yqpal etedi», - dedi jýrnalısterge bergen suhbatynda Erkebulan Ábihan.

Roýd-shoý aıasynda Qazaqstan men Ózbekstannyń týrıstik sektorynyń ókilderi B2B formatyndaǵy kezdesýlerde yntymaqtastyqty keńeıtýdi ń ózekti máseleleri boıynsha pikir almasyp, birlesken týrıstik ónimderdi damytý jáne ilgeriletý salasyndaǵy ózara is-qımyl tetikterin talqylady.

«Qazaqstan – bizdiń eń jaqyn kórshimiz, bizdi tarıhı turǵydan túsinikti ortaq mádenıet baılanystyrady. Bizdiń kompanııa týrıstik ındýstrııa naryǵynda 15 jyldan astam ýaqyt qyzmet etip keledi. Biz qazaqstandyq qonaqtarǵa, atap aıtqanda, Almaty qalasynan Ózbekstanǵa turaqty týrlar uıymdastyryp kelemiz. Búgin tusaýkeser barysynda Almatyǵa tezirek kelýge nıet bildirgen fantastıkalyq oryndardy kórdik. Endi gastronomııalyq, ekologııalyq, taýly, tarıhı-mádenı týrızm aıasynda ózbekterge arnalǵan týrıstik týrlardy keńeıtýdi josparlap otyrmyz. Búgingi shara ózbek týroperatorlary úshin jol ashady, biz qazaqstandyq áriptesterimizben uzaqmerzimdi jáne tıimdi yntymaqtastyq ornatýdy asyǵa kútemiz», - dedi Nasibtour týrıstik kompanııasynyń ókili Nazıma ıÝzýfbekova.