Tashkentte Abaı shyǵarmashylyǵyna arnalǵan kórme ashyldy
Kórmeniń ashylý saltanatyna Ózbekstan Premer-Mınıstriniń orynbasary, Týrızm jáne mádenı mura mınıstri Ázız Ábdihaqymov, Qazaqstannyń mádenıet jáne sport mınıstri Dáýren Abaev, Qazaqstannyń Ózbekstandaǵy elshisi Beıbit Atamqulov, «Jıdebaı-Bórili» Abaı mýzeıiniń dırektory Turdyqul Shanbaı, Beıneleý óneri galereıasynyń dırektory Kamola Akılova men zııaly qaýym ókilderi qatysty.
Qazaqstannyń mádenıet jáne sport mınıstri Dáýren Abaev kórme jumysyn uıymdastyrǵany úshin ózbek tarapyna alǵysyn bildirdi.
«Álisher Naýaı men Abaıdyń shyǵarmashylyǵy – jalpy adamzat qundylyqtarynyń qalyptasý úlgisin beıneleıtin uly mura. Eki oıshyl ártúrli ýaqytta ómir súrse de, olardy gýmanızmge degen umtylys pen poezııadaǵy reformatorlyq rýh biriktiredi. Ekeýi de baýyrlas halyqtyń rýhanı tiregi», – dedi Dáýren Abaev.
Óz kezeginde Ózbekstan Premer-Mınıstriniń orynbasary, Týrızm jáne mádenı mura mınıstri Ázız Ábdihaqymov qazirgi ýaqytta túrki halyqtarynyń mádenı murasyn saqtaý jáne qalpyna keltirý boıynsha úlken jumystartar júrgizilip jatqanyn atap ótti.
«Qazaqtyń uly jazýshysy Abaıdyń shyǵarmashylyǵyna arnalǵan kórmeniń ashylýy – Ózbekstan men Qazaqstan arasyndaǵy dostyqtyń nyǵaıyp kele jatqanyn aıǵaqtaıdy. Osy múmkindikti paıdalana otyryp, Qazaqstannyń mádenıet jáne sport mınıstri Dáýren Abaevqa «Ózbekstanǵa qosh keldińiz» dep aıtqym keledi. Búgin ashylǵan kórme Uly oıshyl Álisher Naýaıdiń gýmanıstik dástúrlerin saqtaǵan Abaı shyǵarmashylyǵyn jaqsy túsinýge múmkindik beretinine senimdimiz. Onyń shyǵys pen batystyń birligi týraly, álemdik murany ıgerý qajettiligi, entsıklopedızmge umtylý, adam tabıǵatyn jetildirý týraly ıdeıalary qazirgi kezeńde de ózektiligin joǵaltqan joq», – dedi Ázız Ábdihaqymov.
«Abaı. Baýyrlas halyqtardyń murasy» kórmesi kelesi negizgi bólimderden turady:
- Kóshpeli mádenıet Abaıdyń qalyptasýynyń negizgi faktory retinde;
- Álisher Naýaıdiń Abaıdy qalyptastyrýdaǵy rýhanı tálimger retindegi róli;
- Abaı ómiriniń negizgi kezeńderi;
- Sýretshiler Á. Qasteev, Ó. Tańsyqbaev, E. Sıdorkın, N. Ótepbaev jáne t. b. shyǵarmalaryndaǵy Abaı keıipkerleri men sıýjetteri.
Kórmede qazaqtyń dástúrli turmysy, sándik-qoldanbaly óneri, keskindeme, grafıka, Abaı týraly basylymdar, onyń shyǵarmalary usynylǵan.
«Abaı. Baýyrlas halyqtardyń murasy» kórmesi Tashkentte 19-30 jeltoqsan aralyǵynda ótedi.
Sonymen qatar búgin Tashkentte Abaıdyń eskertkishine gúl shoqtaryn qoıý rásimi ótti.
