Tashkentte 61 jastaǵy muǵalim 10-synyp oqýshysyna sezimin bildirgeni úshin sottaldy
TAShKENT. KAZINFORM - Tashkentte 61 jastaǵy muǵalim 2008 jyly týǵan shákirtine degen súıispenshiligin bildirip, sabaq ústinde ádepsiz qylyq kórsetkeni úshin sottaldy. Bul týraly Daryo.uz qalalyq sotqa silteme jasap habarlady.
2025 jylǵy 2 mamyrda Myrza Ulyqbek aýdandyq qylmystyq ister jónindegi soty 1964 jyly týǵan fızıka pániniń muǵalimi I.R.-ǵa qatysty ákimshilik isti qarady.
Ol aýdandaǵy №18 jalpy orta mektepte fızıka pániniń muǵalimi bolyp qyzmet atqarǵan. 2024 jyldyń 4 qarashasynan bastap sol mektepte oqıtyn 2008 jyly týǵan 10-synyp oqýshysyna qatysty jónsiz áreketter jasaǵan.
Atap aıtqanda, ol oqýshyǵa túrli «smaılıkter» jiberip, 2025 jyldyń 8 aqpanynda orys tilinde «ıa tebıa lıýblıý» degen sııaqty sózdermen sezimin bildirip, synyptastarynan onyń jeke ómiri týraly surap, sabaq kezinde oǵan qarap, seksýaldyq áreketter jasaǵan.
Sotta muǵalim qyzdy eki jyl boıy ańdyp júrgenin, ony jaqsy kóretinin, jaman nıeti joq ekenin aıtyp, jeńil jaza surady.
Boıjetken oqıǵa týraly 2025 jyldyń 29 sáýirinde anasyna habarlaǵan. Anasy mektep ákimshiligine habarlaǵanyn, biraq olar máseleni «syrtqa shyǵarmaı» sheshýge tyrysqanyn jáne eshqandaı tártiptik shara qoldanbaǵanyn aıtty. Mektep dırektory qyzdan muǵalimniń daýysty jazbasyn alýdy suraǵan, biraq muǵalimge eshqandaı shara qoldanbaǵan.
Tergeý barysynda muǵalimniń qyzǵa synyptastarynyń biri arqyly «Menen qoryqpasyn, men ony jaqsy kóremin, meniń mańyzdy josparlarym bar, oǵan úılengim keledi» dep habarlama jibergeni anyqtaldy.
Sot muǵalimdi kináli dep tanyp, 5 táýlikke ákimshilik qamaqqa alý týraly úkim shyǵardy.
Eske sala keteıik, Kıevte 11 adamdy óltirgen ózbekstandyq ómir boıyna bas bostandyǵynan aıyryldy.