Tashkent ýnıversıtetinde akademık Q. Sátbaev atyndaǵy aýdıtorııa ashyldy
Aýdıtorııa D. Serikbaev atyndaǵy Shyǵys Qazaqstan memlekettik tehnıkalyq ýnıversıteti men I. Karımov atyndaǵy Tashkent memlekettik tehnıka ýnıversıteti arasyndaǵy yntymaqtastyq aıasynda ashyldy. Aýdıtorııa D. Serikbaev ýnıversıtetiniń qarajatyna jabdyqtalyp, qajetti tehnıka jáne ádebıettermen qamtamasyz etildi.
Aldaǵy ýaqytta eki ýnıversıtet stýdentter, professor-oqytýshylar quramynyń akademııalyq mobıldiligi salasynda da qarym-qatynas ornatpaq. Budan bólek, metallýrgııa jáne geologııa boıynsha birlesken bilim baǵdarlamalaryn da jasaý josparlanǵan.
ShQMTÝ ǵylymı jumystar jáne zertteýler jónindegi prorektory Oleg Gavrılenkonyń aıtýynsha, joǵary oqý oryndary arasyndaǵy yntymaqtastyqtyń negizinde birlesken bilim baǵdarlamalary, ǵylymı zertteýler, akademııalyq jáne ǵylymı bilimderdi almasý jatyr.
«Osylardyń alǵashqysy boıynsha biz ózbek áriptestermen birlese magıstr jáne doktoranttardy daıarlaımyz. Ekinshisi baǵyt boıynsha halyqaralyq zertteý toptary arqyly birlesken ǵylymı jobalar iske asyrylady. Úshinshi baǵyt boıynsha, ǵalymdar tájirıbeleri men ǵylymı jetistikterin bólisedi. Buǵan múmkindikter jetkilikti. Bul, ásirese, QR Prezıdenti Qasym-Jomart Toqaevtyń Ózbekstanǵa jasaǵan saparynan keıin ózekti bola tústi», - deıdi O. Gavrılenko.
Avtor: Mıras Qýandyqov