Tashkent tórinde Naýryz meıramy toılanyp jatyr

TAShKENT. QazAqparat – Ózbekstan astanasynda Naýryz meıramy tańnan beri toılanyp jatyr, dep habarlaıdy QazAqparattiń menshikti tilshisi.

Ortalyq Azııa men Taıaý Shyǵystyń ózge de halyqtary sııaqty, ózbekter úshin de Naýryz kóktem men jańarýdyń, san ǵasyrlyq ulttyq qundylyqtardyń, ádet-ǵuryptardyń merekesi. Ejelden Ózbekstan turǵyndary kóktemniń kelgenin asyǵa kútedi. Óıtkeni jer qoıny qyzǵan sátten bastap baqsha, jasyl kilemge aınalǵan dala tósinde dýman bastaıdy.

Jergilikti dástúr boıynsha bul kúnderi qazan kóterilip, analar men ájeler sýmalıak, halım, kók-samsa, gýja sııaqty dástúrli taǵamdardy ázirleıdi. Aǵzanyń qýatyn arttyratyn bul taǵamdar týǵan-týysqandarǵa, kórshiler men qonaqtarǵa taratylady.

Uly aqyn Álisher Naýaıdiń «ár tún sen úshin Naýryzdaı qasıetti bolsyn, kúnińiz Naýryz sııaqty jarqyn bolsyn» dep keletin jyr joldary bul merekeniń ózbek halqy úshin qanshalyqty mańyzdy jáne qundy ekenin kórsetedi.

Bul joly da ózbek jurty ejelden kele jatqan dástúrinen jańylǵan joq. Merekeniń ajaryn ulttyq án-bımen, ádet-ǵuryptarmen, sahnalyq qoıylymdarmen asha tústi.

Eske sala ketsek, Ózbekstanda bıylǵy Naýryz merekesi karantın talaptaryna sáıkes uıymdastyrylýy tıis. Merekelik is-sharalar ashyq alańdarda, ıaǵnı saıabaq, alleıa men stadıondarda ótkiziledi. Oǵan halyqtyń kóp jınalmaýy jáne kelýshilerdiń maska taǵýy, áleýmettik qashyqty saqtaýy qadaǵalanady.

Avtory Mádıbek Jánibekov