Tashkent – Oral baǵytynda jańa áýe reısi ashylady

ORAL. KAZINFORM – Oral qalasynyń halyqaralyq áýejaıy arqyly áýe reısteri jeti baǵyt boıynsha qatynaıdy.

BQO jolaýshylar kóligi jáne avtomobıl joldary basqarmasy basshysynyń orynbasary Narıman Temirǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde tórteýi respýblıkalyq (Astana, Almaty, Qaraǵandy, Aqtaý) jáne úsheýi halyqaralyq (Frankfýrt, Fýkýok, Sharm-El-Sheıh) baǵytta ushyp júr.

Narıman Álibekulynyń sózine qaraǵanda, 2026 jyldyń naýryz aıynda jańadan Tashkent – Oral reısi ashylady.

- Kúni búgin 2 jeltoqsannan bıletter satylymy bastaldy. Reısterdi «Centrum» áýe kompanııasy aptasyna eki ret oryndaıdy, - dedi N.Temirǵalıev.

Onyń aıtýynsha, búgingi tańda oblysta avtobýstar 4 halyqaralyq (Samara, Orynbor, Tolıattı, Saratov) jáne 1 oblysaralyq (Atyraý) baǵytta jolaýshylar tasymaldaıdy. Sondaı-aq 27 aýdanaralyq marshrýtqa 21 tasymaldaýshy qyzmet kórsetedi. Barlyq 12 aýdan ortalyǵy avtobýs marshrýttarymen qamtylǵan. 

- Aýdandarda taksı qunynyń ósýine baılanysty avtobýstarda jolaýshylar sany artyp, jańa marshrýttar ashý týraly ákimdikterden usynystar túsip jatyr. Jyl saıyn 2-3 ret jolaýshylar men bagajdy avtomobılmen respýblıkaishilik turaqty tasymaldaý marshrýttaryna qyzmet kórsetý quqyǵyna arnalǵan konkýrstar ótkiziledi. 2024 jyldy 22 marshrýtpen aıaqtasaq, bıyl olardyń sany 27-ge jetti, - dep qosty N.Temirǵalıev.

Basqarma derekterine sáıkes óńir arqyly temirjolmen halyqaralyq Almaty - Saratov, oblysaralyq Oral - Astana, Oral - Almaty, Oral - Mańǵystaý jáne aýdanaralyq Oral - Semıglavyı Mar, Oral-Shyńǵyrlaý jolaýshylar poıyzy ótedi. 

Eske sala keteıik, budan buryn Atyraýdan Oralǵa ushatyn reıstiń toqtatylǵanyn jazǵan bolatynbyz.