Tashkent modernızminiń 10 sáýlet nysany ıÝNESKO-nyń Búkilálemdik muralar tizimine endi
ASTANA. KAZINFORM — Tashkent modernızminiń on sáýlet nysany Birikken Ulttar Uıymynyń Bilim, ǵylym jáne mádenıet máseleleri jónindegi uıymynyń (ıÝNESKO) Búkilálemdik muralar tizimine engizildi. Tıisti sheshim Ońtústik Koreıanyń Pýsan qalasynda ótken ıÝNESKO-nyń Búkilálemdik mura komıtetiniń 48-sessııasynda qabyldanǵanyn Ózbekstannyń Mádenı mura agenttigi habarlady.
«Tashkent modernızminiń sáýleti. Ortalyq Azııadaǵy modernızm men dástúr» atty ulttyq nomınatsııaǵa HH ǵasyrdyń ekinshi jartysynda boı kótergen 10 kórnekti sáýlet eskertkishi endi.
Olardyń qatarynda «Jemchýg» turǵyn úıi, Ózbekstannyń Memlekettik tarıh mýzeıi, «Halyqtar dostyǵy» óner saraıy, Ózbekstannyń Memlekettik óner mýzeıi, Tashkent memlekettik tsırkiniń ǵımaraty, Kórkemóner akademııasynyń Ortalyq kórme zaly, Ulttyq kıno óneri saraıy, «Chorsý» bazary, «Kosmonavtar» metro stantsııasy, sondaı-aq Tashkent oblysyndaǵy «Kún» (Solntse) gelıokesheni bar.
Ózbekstannyń Mádenı mura agenttiginiń málimetinshe, bul nysandar óz dáýirindegi jańashyl sáýlet sheshimderi men Ortalyq Azııanyń ulttyq dástúrlerin úılestirgen biregeı sáýlet kesheni sanalady.
Atalǵan sáýlet ansambli Ózbekstannyń ıÝNESKO-nyń Búkilálemdik muralar tizimine engen altynshy mádenı mura nysany boldy. Sonymen qatar bul – sońǵy 25 jyl ishinde eldiń jeke ulttyq nomınatsııasy retinde osy mártebege ıe bolǵan alǵashqy joba.
Sondaı-aq Ózbekstan Ortalyq Azııa men Táýelsiz Memleketter Dostastyǵy (TMD) keńistiginde HH ǵasyrdaǵy modernıstik sáýlet murasyn ıÝNESKO-nyń Búkilálemdik muralar tizimine engizgen alǵashqy memleket atandy.
Aıta keteıik, buǵan deıin Qytaıdyń dástúrli farfor óndirisi ıÝNESKO-nyń Búkilálemdik muralar tizimine engen bolatyn.
