«Astana Balet» teatr maýsymyn «Altyn gúl» premerasymen aıaqtaıdy
ASTANA. KAZINFORM — Teńlik qorǵanynan tabylǵan jádiger jańa baletke arqaý boldy, dep habarlaıdy QR Mádenıet jáne aqparat mınıstrliginiń baspasóz qyzmeti.
26-27 maýsym kúnderi «Astana Balet» teatry sahnasynda «Altyn gúl» baleti qoıylady. Atalǵan týyndy teatrdyń shyǵarmashylyq maýsymyn túıindeıtin aıtýly premera bolmaq.
— Qoıylym ıdeıasyna b. z. d. III–II ǵasyrlarǵa jatatyn, Teńlik qorǵandarynan tabylǵan, qyzǵaldaq beınesi bederlengen altyn plastına arqaý bolǵan. Lıbretto avtory — aqyn, Qazaqstannyń eńbek sińirgen qaıratkeri Baqyt Qaıyrbekov. Premera ulttyq qundylyqtardy dáriptep, adam men tabıǵattyń úılesimin, urpaqtar sabaqtastyǵyn kórkem túrde beıneleıdi, — delingen habarlamada.
Qoıylymnyń basty keıipkeri — dala qyzǵaldaǵynyń sulýlyǵynan shabyt alǵan zerger. Onyń taǵdyry arqyly atadan balaǵa jalǵasqan dástúr, týǵan jerge degen súıispenshilik jáne ulttyq qundylyqtarǵa adaldyq ıdeıasy horeografııa, mýzyka jáne sahnadaǵy obrazdar negizinde sýretteledi. Balet mýzykasyn Qazaqstannyń eńbek sińirgen qaıratkeri Renat Ǵaısın jazǵan.
Spektakldiń qoıýshy-horeografy — Qazaqstannyń eńbek sińirgen qaıratkeri, teatrdyń bas baletmeısteri Muqaram Ábýbahrıeva. Al ártisterdiń bolmysyn sýretshi Áıgerim Altybasarova ázirlegen sahnalyq kostıýmder asha túsedi.
«Altyn gúl» qoıylymynda klassıkalyq balet, neoklassıka men zamanaýı bı baǵyttary ushtastyrylady. Spektakl bas dırıjer Arman Orazǵalıevtiń jetekshiligindegi sımfonııalyq orkestrdiń súıemeldeýimen ótedi.
Budan buryn Shymkentte Mádenıet jáne óner ýnıversıteti qurylyp, jańa Opera jáne balet teatry salynatynyn jazǵanbyz.
