Tashkent Qazaqstan Prezıdentin qarsy alýǵa daıyndalyp jatyr — fotoreportaj
TAShKENT. KAZINFORM — Ózbekstan Prezıdentiniń shaqyrýymen búgin Memleket basshysy Qasym-Jomart Toqaev Tashkentke memlekettik saparmen keledi, dep habarlaıdy Kazinform agenttiginiń menshikti tilshisi.
Ózbek tarapy joǵary deńgeıdegi saparǵa aıyrqsha mán bere otyryp, qyzý daıyndyqqa kirisken. Atap aıtqanda, Tashkenttegi mamyrajaı tirshilik bul kúnderi qarbalasqa ulasty.
Ásirese, qalanyń kommýnaldyq qyzmeti mamandarynyń jumysy erekshe kózge túsedi. Olar birneshe kúnnen beri kóshet pen gúl egip, qalany tazalap, abattandyrýmen aınalysyp jatyr.
Sondaı-aq, I.Karımov atyndaǵy Tashkent halyqaralyq áýejaıynan bastap, shahardyń ortalyǵyna deıingi Á.Naýaı, A.Qadyrı, Qarasaraı kósheleri men Kishi aınalma joldyń boıyna Qazaqstan týlary ilindi. Atalǵan aýmaqtardaǵy qaýipsizdik sharalary da kúsheıtilgen. Prezıdent Qasym-Jomart Toqaevtyń korteji júrip ótetin Tashkenttiń basty kóshelerinde Ultyq gvardııa sarbazdary men jol qozǵalysy ınspektorlary sap túzep tur.
Josparǵa saı, Memleket basshysy mingen nómiri birinshi bort Tashkent áýejaıyna búgin tústen keıin kelip qonady. 15 qarashada Qasym-Jomart Toqaev pen Shavkat Mırzıeev áýeli shaǵyn, keıin keńeıtilgen quramda kelissóz júrgizedi.
Prezıdentter saýda, ónerkásiptik kooperatsııa, kólik jáne logıstıka, energetıka, sý resýrstary, mádenı-gýmanıtarlyq salalardaǵy jobalardy talqylap, yntymaqtastyqtyń basym baǵyttaryn aıqyndaıdy.
Al 16 qarashada Tashkenttegi Kongress-ortalyqta Ortalyq Azııa memleketteri basshylarynyń jetinshi Konsýltatıvtik kezdesýi ótedi. Oǵan óńir elderiniń prezıdentteri qatysady.
Aıta ketelik 14-15 qarasha kúnderi Qasym-Jomart Toqaev Ózbekstan Prezıdenti Shavkat Mırzıeevtiń shaqyrýymen Tashkentke memlekettik saparmen baratyny týraly jazǵan edik.