Tashkent Qazaqstan Prezıdentiniń saparyna qyzý daıyndalýda
TAShKENT. QazAqparat - QR Prezıdenti Qasym-Jomart Toqaevtyń Ózbekstanǵa alǵashqy memlekettik sapary qarsańynda Tashkent qalasynyń kóshelerin arnaıy bannerlermen jáne sımvolıkamen bezendirdi, dep habarlaıdy QazAqparat.
Ózbekstan astanasynyń bas kóshelerinde qazaq jáne ózbek tilinde jazylǵan bannerlerdi kórýge bolady. Onda «Asa qurmetti Qazaqstan Prezıdenti Qasym-Jomart Toqaev, Ózbekstanǵa qosh keldińiz!» degen tilekter bar. Budan bólek, kósheniń boıymen eki eldiń týlaryn ilip qoıdy.
QR Prezıdenti Qasym-Jomart Toqaevtyń memlekettik sapary aıasynda Ózbekstandaǵy Qazaqstan jyly resmı túrde ashylady. Sol jerde elimizdiń mádenıet qaıratkerleri men tanymal ártisteri óner kórsetedi.
Al Ózbekstannyń memlekettik óner mýzeıinde «Uly dala: tarıh men mádenıet» atty kórme ashyldy. Ol jerge Qazaqstannyń sımvoly - Altyn adam qoıyldy.
Sondaı-aq, Ózbekstannyń resmı aqparattyq agenttigi tuńǵysh ret qazaq tilindegi nusqasyn iske qosty. Atalǵan agenttik resmı memlekettik aqparat kózi ári eldegi jetekshi aqparat agenttigi bolyp sanalady. ÓzA ózbek, orys, aǵylshyn, frantsýz, nemis, ıspan, arab, qytaı tilderinde aqparat taratady. QR Prezıdenti Qasym-Jomart Toqaev osy bastamaǵa qatysty pikir bildirgen edi.
Budan bólek, Memleket basshysy "ÓzA" ulttyq aqparat agenttigine suhbat berip, Ózbekstan men Qazaqstan arasyndaǵy yntymaqtastyqtyń qazirgi jaı-kúıi men damý keleshegi, qol jetkizilgen nátıjeleri jaıynda aıtyp bergen bolatyn.
