Tashkent qalasyna TMD-nyń jastar astanasy mártebesi berildi
TAShKENT. KAZINFORM — Ózbekstanda Tashkent qalasyna «TMD-nyń jastar astanasy» mártebesin berý saltanatty rásimi ótti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Oǵan Ózbekstan, Reseı, Ázerbaıjan, Armenııa, Belarýs, Qazaqstan, Qyrǵyzstan jáne Tájikstan delegatsııalarynyń basshylary qatysty.
Tashkentke TMD-nyń alǵashqy jastar astanasy mártebesin berý sheshimi byltyr maýsymda Sochıde ótken TMD elderi Úkimet basshylary qeńesiniń otyrysynda qabyldanǵan bolatyn.
Búgingi saltanatty sharaǵa qatysýshylarǵa TMD Bas hatshysy Sergeı Lebedev quttyqtaý hatyn joldap, memleketaralyq baılanystar jetilip, jańa jobalar men baǵdarlamalar júzege asa beretinin atap ótti.
«TMD-nyń jastar astanasy» jobasy dostastyq elderiniń jastarymen ózara baılanysty nyǵaıtý, daryndy azmattardyń áleýetin damytý jáne halyqaralyq yntymaqtastyqty jetildirý máselelerinde tájirıbe almasýǵa baǵyttalǵan iri jobalardyń biri», — dedi Sergeı Lebedev.
TMD-ǵa qatysýshy memleketterdiń Jastar isi jónindegi keńesi hatshylyǵy basshysynyń orynbasary Tatıana Kovaleva Tashkent hokımatyna jańa mártebe berilgenin aıǵaqtaıtyn kýálikti tabys etti.
Aıta keteıik, 2025 jyly Ázerbaıjannyń Gabala qalasy jastar astanasy bolady, al 2026 jyly bul mártebe Armenııanyń Kapan qalasyna beriledi.
