Tashıev: Jemqorlyqpen kúreste týystarym men dostaryma jekkórinishti boldym

ASTANA. KAZINFORM – Qyrǵyzstan Ulttyq qaýipsizdik memlekettik komıtetiniń (UQMK) tóraǵasy Kamchybek Tashıev sybaılas jemqorlyqpen kúrestiń jeke ómirine de áser etkenin aıtty. Bul týraly ol Region telearnasyna bergen suhbatynda málimdedi, dep habarlaıdy Kabar.

Tashıevtiń aıtýynsha, sybaılas jemqorlyqqa qarsy belsendi áreketteri onyń mańaıyndaǵy adamdardyń edáýir narazylyǵyn týdyrǵan.

«Sybaılas jemqorlyqpen kúres – memleket pen bolashaq urpaq úshin mańyzdy. Biraq bul áreketim kóptegen azamattardyń, sonyń ishinde paraqorlyqqa qatysy bar týystarymnyń da kóńilinen shyqpady. Memleketke aktıvterdi qaıtarǵandardyń arasynda burynǵy dostarym, týystarym, áriptesterim jáne dostarymnyń jaqyndary bar. Bul bizge aýyr tıdi. Osy qyzmetke kelgennen keıin dostarym men týystarymnyń 70 paıyzynan aıyryldym. Men olarǵa bıik laýazymym úshin emes, óz jumysymnyń saldarynan barmaıtyn boldym», – dedi ol.

UQMK basshysy suhbatynda birneshe jaqyn týysyna qatysty tergeý jumystary júrgizilgenin de aıtty.

«Meniń bir qudasym 2020-2023 jyldary jasaǵan qylmystary úshin qazir tergeý ızolıatorynda otyr. Týystarymnan kimder kelmedi bosatýdy surap. Biraq barlyǵyna bas tarttym. Ol qamaýda qalýy tıis, jazasyn óteýi kerek. Áıtpese maǵan eshkim senbeıdi. Marqum aǵamnyń uly bir jol-polıtseıin balaǵattaǵany úshin ustaldy. Eger ony jazalamasaq, basqa bireýi prokýrordy, taǵy biri ákimdi balaǵattaýy múmkin. Bul qoǵamda tártipsizdikke aparady. Osy úshin meni týystarym jek kóretin jaǵdaılar da boldy. Biraq men ne isteı alamyn? Men úshin eń mańyzdysy – memlekettegi tártip. Eger prıntsıpsiz bolsam, UQMK-ny basqarýǵa moraldyq quqyǵym bolmaıdy», – dep atap ótti Kamchybek Tashıev.

Aıta keteıik, Qyrǵyzstan Konstıtýtsııalyq soty ólim jazasyn engizý týraly prezıdent bastamasyn qarastyrady.