Tas jolda qarama-qarsy júrip, júrgizýshi quqyǵynan aıyryldy
ALMATY. QazAqparat - Almatyda Ál-farabı dańǵylymen qarama-qarsy júrgen Ákim Qýanyshqa kólik tizgindeýge tyıym salyndy. Ákimshilik ister boıynsha mamandandyrylǵan aýdanaralyq soty osyndaı sheshim shyǵardy, dep habarlaıdy QazAqparat tilshisi.
Qalalyq sottyń baspasóz qyzmeti habarlaǵandaı, 22 qazanda túngi 23.30 shamasynda «Mersedes» tizgindegen Ákim Qýanysh Ál-farabı dańǵyly men Nazarbaev dańǵylynda jol aǵynyna keri baǵytta júrgen.
Jaýapsyz júrgizýshi qatardan qatarǵa aýysqanda, ózge kólikterdi joldan yǵystyryp, apattyq ahýal týǵyzǵan.
Sot bastalǵaly beri sottalýshy otyrysqa eki ret kelem dep ýáde berip, tóbe kórsetpegen.
Sot Ákim Qýanyshty QR ÁqbK 596-babynyń 3-bólimimen, 606-babynyń 2-bólimimen aıypty dep taýyp, 1 jylǵa júrgizýshi quqyǵynan aıyrý týraly úkim shyǵardy.
Aıta ketý kerek, almatylyq Ákim Kýanysh bıyl mamyr aıynda QR ÁqbK 606-babynyń 2-bólimimen ákimshilik jaýapkershilikke tartylǵan bolatyn.
Munyń aldynda Almaty turǵyny Nazar Rollan jol erejesin óreskel buzyp, áleýmettik jelini shýlatqan bolatyn.
Ol Ál-Farabı jáne Mustafın kósheleriniń boıynsha jol júrý tártibin buzyp, qarama-qarsy baǵytta júrgen.
Sondaı-aq, óziniń áreketin ınstagram jelisinde jarııalaǵan bolatyn.
Nazar Rollan Ákimshilik kodekstiń bes baby boıynsha tártiptik jazaǵa tartylsa da, odan qorytyndy shyǵarǵan joq. Sondyqtan, Almaty qalasynyń mamandandyrylǵan aýdanaralyq ákimshilik sotynyń sheshimimen buzaqylyq isi boıynsha ony 7 táýlikke qamaýǵa aldy.
Keıin Almaty polıtsııasy ınternet pablıkteriniń jumysyn baqylaý tobyn qurdy.
Olar «Instagram» jelisindegi «Nelegal.kaz» pablıgin jiti baqylaýǵa aldy. Munda jazylýshylar jol erejesin buzǵan sátterin sýretin, vıdeosyn jiberedi. 174 jarııalanymnyń ishinde 85 vıdeo men 89 foto jiti qaraldy. Olardyń 11-i boıynsha ákimshilik hattama jasalady. 6 oqıǵa Almatyda bolǵan, onyń 5-ýi boıynsha hattama toltyryldy. Qalǵandary boıynsha jumys júrgizilip jatyr.
