Tas qarańǵyda turamyz: ShQO-da aýyl halqy kóshelerinde jaryq joqtyǵyna shaǵymdandy
ÓSKEMEN. KAZINFORM — Shyǵys Qazaqstan oblysy Kúrshim aýdany Úshbulaq aýylynyń turǵyndaryn tolǵandyrǵan túıtkildi máseleler shash etekten. Onyń ishinde eń ózektisi — kóshelerdegi jaryqtyń joqtyǵy. Bul ásirese keshke mektepten qaıtqan oqýshylarǵa yńǵaısyz. Odan soń aýyl halqyn ınternet pen aýyzsý máseleleri de mazalap otyr.
«Halyq únine qulaq aspaıdy»
Kazinform redaktsııasyna habarlasqan úshbulaqtyqtar aýyldyq okrýg ákimine talaı márte júgingenderin, biraq odan esh nátıje bolmaǵanyn aıtty.
«Aýyl kósheleriniń jaryqtandyrylmaı kele jatqanyna qanshama ýaqyt ótti. Sonda osylaı tas qarańǵyda tura beremiz be?! Keshkisin dalada telefonsyz júre almaısyń. Kózge túrtse kórgisiz. Bastaýysh synypta oqıtyn balalardy obal. Mektepten qaıtqanda qorqady», — deıdi aty-jónderin atamaýdy suraǵan aýyldyqtar.
Olardyń aıtýynsha, aýylǵa ınternet ornatýǵa bir kompanııa qyzmetkerleri kelgen. Biraq áli kúnge deıin ınternet qoljetimdi emes.
«Bizge aýyzsý tartylǵany ras. Biraq qudyqtardy qalaı bolsa solaı ornatyp ketti. Bir qudyq múlde maıysyp qulap jatyr. Jergilikti jurt otyn tıeıtin júk kóligi qaǵyp ketken deıdi. Endi sony jóndep qoıýǵa bolady ǵoı?! Jalpy aýyldyq okrýg ákiminiń jumysyna kóńilimiz tolmaıdy. Halyqpen sóılespeıdi, bir usynys aıtsaq múlde qulaq aspaıdy. Suraq qoısaq jaýap bermeıdi. Jyldyq esep te bermeıdi. Sol úshin amalsyzdan sizderge habarlasýǵa májbúr boldyq. Aýyl halqynyń WatsApp-ta ashqan chat bar. Sonda bári ákimniń jumysyna narazylyǵyn bildirip jatady», — deıdi turǵyndar.
Qarajat bólinip, kelisimshart jasaldy
Búginde Úshbulaq aýylynda 268 adam turady. Jurt kótergen máselelerge qatysty naqty jaýap alý úshin Kúrshim aýdanynyń ákimdigine saýalhat joldadyq.
«Úshbulaq aýylynda jalpy uzyndyǵy 3,75 shaqyrym bolatyn 3 kóshe bar. Onda barlyǵy 40 baǵana ornatylyp, 40 jaryqshamy janyp tur. Olar Abaı kóshesi (kóshe uzyndyǵy 1,5 shaqyrym) Gornaıa kóshesi (0,75 shaqyrym) Jaǵalaý kóshesi (1,5 shaqyrym). Abaı kóshesine 2023 jyly 25 baǵan, 25 lampa ornatyldy. Qalǵan eki kóshe áli tolyq jaryqtandyrylmaǵan», — dep jaýap berdi Kúrshim aýdany ákiminiń orynbasary Meıirjan Álibekov.
Biraq aldaǵy ýaqytta jaryq máselesi sheshimin tappaq. Ol úshin kóshelerge 54 baǵana men 54 jaryq shamyn ornatý josparlanyp otyr eken. Dese de naqty qaı kúni ekendigi ákimdik jaýabynda aıtylmady.
«Úshbulaq aýylyna 2020 jyly bloktik-modýldik stantsııa ornatylǵan. Osy sý tazartý stantsııasy úshin bıýdjetten 26 mln teńge qarajat bólinip, merdiger „Kúrshim“ memlekettik kommýnaldyq kásipornymen kelisimshart jasaldy. Nátıjesinde, 3,3 shaqyrym sý qubyry tartylyp, 12 qudyq ornatyldy. Al ınternetke qatysty aıtar bolsaq, eldi mekende Altel-2G (9,4 mbıt/s) ustaıdy. 2024 jyly antenna-machtalyq qurylǵyny salý úshin 157 mln teńge bólinip, memlekettik satyp alý portalyna konkýrs jarııalanǵan. „Úshbulaq aýylynan batysqa qaraı 5,4 km jerde bıiktigi 40 metr antenna-machtalyq qurylǵyny salý“ jobasy boıynsha 18 shildede merdiger „Drevstroımarketıng“ JShS-men 147 348 068 teńgege kelisimshart jasaldy. Sodan soń antenna-machtalyq qurylǵynyń fýndamenti quıyldy. Qazirgi tańda antennanyń temir materıaldary qurastyrylyp jatyr», — deıdi Meıirjan Álibekov.
Bul jumystyń 50 paıyzy aıaqtalǵan. Qurylys jumystary máresine jetkennen keıin eldi mekende Beeline, Tele2, Aktıv, Altel, Kcell baılanys operatorlarymen Úshbulaq aýyldyq okrýgi ákimdigi arasynda kelisimsharttar jasalýy tıis. Sonyń negizinde aýyl tolyqtaı ınternet jelisimen qamtamasyz etilmek.
