Tartyl Fest-te jańa rekord ornatqan qostanaılyq órt sóndirýshilerdi jattyqtyrady

QOSTANAI. QazAqparat - Startup Fest festıvali barysynda Qostanaı turǵyny Andreı Antonıants týrnıkte tartylý boıynsha jańa rekord ornatty. Belgili bolǵandaı, ol órt sóndirý-qutqarý sporty boıynsha jergilikti quramanyń jattyqtyrýshysy bolyp shyqty, dep habarlaıdy QazAqparat tilshisi.

51 jastaǵy Andreı Antonıants - Qostanaı oblysy Tótenshe jaǵdaılar departamentiniń tehnıgi, órt sóndirý-qutqarý sporty boıynsha áıelder jáne erler komandalarynyń jattyqtyrýshysy.

Ol buǵan deıin týrnıkke 45 ret tartylyp, rekord jańartqan edi.

«Men qysqy kópsaıyspen aınalysamyn, oǵan týrnıkke tartylý da kiredi. 9 tamyzda Qaraǵandyda kópsaıys boıynsha Qazaqstan chempıonatynda bolyp, 49 ret tartyldym. Keremet áser alǵanymyz úshin uıymdastyrýshylarǵa úlken rahmet», - dedi Andreı Antonıants.

Buǵan deıin habarlaǵanymyzdaı, Tartyl Fest Qostanaı oblysynda qaıtys bolǵan bes jasar qyz Mádına Erlanqyzyn bir mınýt únsizdikpen eske alýmen bastaldy. Qaıǵyly jaǵdaıǵa baılanysty baıqaýdyń kontserttik shoý baǵdarlamasy men oıyn-saýyq bólimi toqtatyldy. Sondaı-aq is-sharanyń hedlaıneri, sýretshi 2Rar josparly qoıylymy bolǵan joq.

Vıdeodan alynǵan kadr/instagram.com/qostanai_tjd